
遍知贝玛嘎波大师教言集PK70ལམ་ཟབ་བླ་མ་བསྒྲུབ་བའི་ཁྲིད་རིམ་གཉིས་གདན་རྫོགས་བཞུགསོ།།
10-237
༄༅། །ལམ་ཟབ་བླ་མ་བསྒྲུབ་བའི་ཁྲིད་རིམ་གཉིས་གདན་རྫོགས་བཞུགསོ།།
༄། །བྱུང་ཁུངས་ཀྱི་གླེང་བསླང་བ།
༄༅། །ལམ་ཟབ་བླ་མ་བསྒྲུབ་བའི་ཁྲིད་རིམ་གཉིས་གདན་རྫོགས་བཞུགསོ།། 
10-238
༄༅། །རྡོ་རྗེའི་སློབ་དཔོན་བདག་པོཆེན་བོའི་ཞབས་ཀྱི་པདྨོ་རྙོག་པ་མེད་པ་ལ་ཕྱག་འཚལ་ལོ། །དལ་བཞིའི་ར་བར་ཐར་འདོད་དགེ་བའི་མགྲོན། །དབང་བཞིའི་དྲི་བཟང་ཕུལ་ཀྱི་དབུགས་དབྱུང་སྟེ། །སྐུ་བཞིའི་འབྲས་
བུ་བསྟབས་པས་ཚིམ་མཛད་པ། །རྣམ་བཞིའི་སློབ་དབོན་ཙཱུ་ཏའི་ཕྲེང་བར་འདུད། །རིག་པ་ནོར་རྒྱས་ཀྱིས་འཁྱུད་མྱོང་བའི་རིིས། །ལུང་གི་ཆུ་གཏེར་བསྲུབས་འཐོན་མན་ངག་གི་ །བདུད་རྩི་འདི་སོགས་རྨད་བྱུང་རྩི་
ཡང་གིས། །འཇིག་རྟེན་དགེར་མཛད་ཏིལ་བརྡུང་ཞབས་ལ་འདུད། །སངས་རྒྱས་གསུང་གི་རིན་ཆེན་ཟ་མ་ཏོག །མཐའ་དྲུག་ཚུལ་བཞིའི་སྒྲོམ་བུར་རྒྱས་བཏབ་པ། །ཇི་བཞིན་ཕྱེ་ནས་མི་ཤེས་མུན་སེལ་བའི། །པཎ་ཆེན་
ནཱ་རོ་བརྒྱུད་པར་བཅས་ལ་འདུད། །མངོན་བར་བྱང་ཆུབ་གནས་སུ་འགྲོ་རིངས་ལ། །གྲངས་མང་བགྲོད་དཀར་མྱོག་ཚིག་ཉི་འོད་ཀྱིས། །མ་གདུངས་དང་པའི་གྲིབ་བསིལ་ལ་བརྟེན་པའི། །མྱུར་བའི་ལམ་འདི་ཕྱེ་བས་
སྐལ་བཟང་བྱ། ། རྒྱ་ཆེ་བའི་ལུང་ཐམས་ཅད་ཀྱི་གཙོ་བོ། རྨད་དུ་བྱུང་བར་ཟབ་པ་ཐམས་ཅད་ཀྱི་བླ་མ། ཕུལ་དུ་ཕྱིན་པའི་རིག་པ་ཐམས་ཅད་ཀྱི་གྲུབ་པ། གཅིག་ཤེས་པས་ཀུན་ཤེས་པར་
བྱེད་པའི་གདམས་ངག །ཚར་གསུམ་ཁུག་པ་དབང་གི་ལམ། རྡོ་རྗེ་སེམས་དཔའ་ཞལ་མཐོང་གི་སྒྲུབ་ཐབས་དེ་བཞིན་གཤེགས་པ་རྣམས་ཀྱི་ཤིན་ཏུ་གསང་བའི་གནས། ཚེ་གཅིག་གིས་བླ་མ་སྐུ་བཞིའི་སར་ཁྲིད་བའི་རིམ་པ་འདི་བཤད་པ་ལ། 
10-239
བྱུང་ཁུངས་ཀྱི་གླེང་བསླང་། ཇི་ལྟ་བུ་བྱུང་བའི་རྡོ་རྗེའི་ཚིག་བཤད་པ་གཉིས་ལས། དང་བོ་ནི། ཤར་སྒྱུ་མ་སྤྲུལ་པའི་ཞིང་ཟ་ཧོར་གྱི་རྒྱལ་ཁམས་ཆེན་པོ་ན། བདེ་བར་གཤེགས་བ་ཉིད་ཀྱི་
སློབ་མ་ཏིལླི་པ་ཞེས་བྱ་བ་རྣལ་འབྱོར་གྱི་སྤྱོད་པ་མཛད་ཅིང་སྐལ་བ་དང་ལྡན་པ་རྣམས་རྗེས་སུ་འཛིན་པར་བཞུགས་སོ། །ཞེས་གཏམ་དུ་སྨྲེང་ནས། པཎྜི་ཏ་ཐམས་ཅད་ཀྱི་གཙུག་གི་ནོར་བུ་
ཇོ་བོ་ནཱ་རོ་ཏ་པས་མཁས་པའི་བྱ་བ་བོར་ནས་དེ་འཚོལ་བ་དོན་དུ་གཉེར་གཉེར་བའི་ཅི་ཞིག་ན་ཨོ་ཏནྟྲ་པུ་རི་ཞེས་བྱ་བའི་གཙུག་ལག་ཁང་དུ་མཇལ་ཏོ། །དེར་བདག་རྗེས་སུ་
གཟུང་དུ་གསོལ་ཅེས་གསོལ་པས། ཞིང་དང་བསམ་པ་དངོས་པོ་གསུམ། །ཞེས་བྱ་བའི་ཚིགས་སུ་བཅད་པ་གཉིས་སྩལ་ནས་གཤེགས་སོ། །དེའི་ཕྱི་བཞིན་འབྲངས་ནས་གཞན་གྱིས་གཏམ་དུ་སྐྱོར་བ་ཡང་བཟོད་པར་མི་
ནུས་པའི་བྱ་དཀའ་བ་ཆེན་པོ་བཅུ་གཉིས་ཀྱིས་མཉེས་པར་མཛད་པས་འདོད་པའི་དངོས་གྲུབ་བཀའ་དྲིན་དུ་སྩལ་ཏེ། ཡང་དག་པའི་ལམ་བལྟ་བར་འདོར་པ་ཐམས་ཅད་ཀྱི་མིག་གཅིག་བུར་གྱུར་ཏོ་ཞེས་
གཅིག་ནས་གཅིག་ཏུ་བརྒྱུད་པས་འཛམ་བུའི་གླིང་ཐམས་ཅད་དུ་ཉི་མ་ལྟ་བུར་གྲགས་སོ། །དེ་ཐོས་ནས་བོད་ཡུལ་གྱི་སྔགས་འཆང་བ་ཐམས་ཅད་ཀྱི་རྡོ་རྗེ་འཆང་མར་པའི་ཞལ་སྔ་ནས་ལུས་དང་སྲོག་ཡལ་བ་བོར་ནས་མཆོག་གི་རྣལ་འབྱོར་པ་དེའི་ཞབས་ཀྱི་པདྨོ་ལ་བསྙེན་བཀུར་བགྱིས་ཏེ་མན་ངག་གི་སྦྲང་རྩི་ཅི་ཡང་འཐུངས་པ་དཔལ་བཞད་པའི་རྡོ་རྗེ་ཞེས་བྱ་བའི་རྣམ་དཔྱོད་ཀྱི་བུམ་པར་སྐྱུགས་པ་དེའི་ཡང་ཐུགས་ཀྱི་བདུད་རྩིར་གྱུར་ནས། 
10-240
རྗེ་བཙུན་ཟླ་འོད་གཞོན་ནུ་དང་། བཛྲ་རཱ་ཛ་དང་། པདྨ་བཛྲ་དང་། ཡེ་ཤེས་རྡོ་རྗེའི་ཞབས་ལ་སོགས་བ་རྣལ་འབྱོར་གྱི་ཚུལ་ལ་གོམས་པས། ལྷག་པའི་ལྷ་མཉེས་པར་མཛད་པས་གཞན་གྱི་དོན་རྒྱ་
ཆེན་པོ་བསྒྲུབ་པ་ལ་བསྙེངས་པ་མེད་པ་འབའ་ཞིག་གི་སྙན་ནས་སྙན་གྱི་བཅུད་ཀྱི་ལེན་དུ་བབས་པ། རྡོ་རྗེ་སེམས་དཔའ་ཉིད་ལ་ངག་དབང་ཆོས་ཀྱི་རྒྱལ་པོ་ཞེས་མཚན་སླད་ནས་བཏགས་པ་
དེའི་བར་དུ་འོངས་ནས། རྡོ་རྗེའི་སློབ་དཔོན་བདག་པོ་ཆེན་པོ་དེས་བདག་ལ་རྗེསུ་བསྟན་པ་ཞིབ་མོར་མཛད་ཅིང་ཤིན་ཏུ་གསང་བའི་ཕྱག་རྒྱ་འབྱེད་པར་ཡང་གནང་བ་སྦྱིན་ནོ།། །།
༄། །ཚིག་དོན་གྱིས་མདོར་བསྟན་པ།
གཉིས་པ་ལ་ཚིག་
དོན་གྱིས་མདོར་བསྟན། མངོན་རྟོགས་ཀྱིས་རྒྱས་པར་བཤད་པ་གཉིས་ལས། དང་པོ་ནི། ཞིང་དང་བསམ་པ་དངོས་པོ་གསུམ། །གཅིག་ཏུ་དྲིལ་ནས་གསོལ་བ་ཐོབ། །གང་འདོད་འབྲས་བུ་འབྱུང་བར་ངེས། །ལྟེམ་རྐྱང་མ་
བྱེད་རྣལ་འབྱོར་པ། །ཞིང་ནི་བཏགས་པའི་དཀྱིལ་འཁོར་དུ་རིགས་དྲུག་དང་། ལུས་ཀྱི་དཀྱིལ་འཁོར་དུ་རིགས་བཞི་དང། །བྷ་གའི་དཀྱིལ་འཁོར་དུ་རིགས་གཉིས་དང་། བྱང་ཆུབ་སེམས་ཀྱི་དཀྱིལ་འཁོར་དུ་རིགས་གཅིག་ཏུ་
སྣང་བའི་བླ་མའོ། །བསམ་པ་ནི། སྤྲུལ་བ་དང་ལོངས་སྤྱོད་རྫོགས་བ་དང་། ཆོས་དང་། ངོ་བོ་ཉིད་སྐུ་ཐོབ་པར་འདོད་པའོ། །དངོས་པོ་ནི། མཆོད་པའི་རྫས་སོ། །གསོལ་བ་བཏབ་པ་ནི། རྣལ་འབྱོར་དུ་བྱ་བའོ། །
10-241
གང་འདོད་པའི་འབྲས་བུ་ནི། སྐུ་གསུང་ཐུགས་ཡེ་ཤེས་ཀྱི་རྡོ་རྗེའོ། །དེ་ཉིད་ཀྱིས་ཉིན་མཚན་ཟད་པར་བྱས་ན་ཚེ་གཅིག་ལ་ངེས་པར་འགྲུབ་ཅིང་གཞན་དུ་རྙེད་པར་དཀའ་བའོ། །ཞེས་སྟོན་པ་ལ་
ལྟེམ་བརྐྱང་མ་བྱེད་ཅེས་གདམས་པའོ། །གེགས་སེལ་རྣམས་ཀྱི་ཆོས་གཅིག་པུ། །བླ་མ་ཡིནོ་རྣལ་འབྱོར་པ། །ཉེས་པའི་རྒྱུར་གྱུར་པ་ནི་དམ་ཚིག་ལ་མི་གནས་པ་ཁོ་ན་སྟེ། དེ་ལས་བཟློག་སྟེ་བླ་
མའི་དམ་ཚིག་ལ་གནས་ན་གེགས་ཐམས་ཅད་ཞི་བར་འགྱུར་རོ། །བོགས་འདོན་པའི་སྦྱོར་བ་ཡང་ལམ་ཟབ་མོ་འདི་ཁོ་ན་ལསགཞན་བཙལ་བར་མི་བྱའོ་ཞེས་སྟོན་པ་ལ། བོགས་འདོན་རྣམས་ཀྱི་ཆོས་གཅིག་
པུ། །བླ་མ་ཡིན་ནོ་རྣལ་འབྱོར་པ། །ཞེས་གསུངས་ཤིང་། རྣལ་འབྱོར་པ་ནི་སྔ་རབས་ཇོ་བོ་ནཱ་རོ་པ་དང་། །ཕྱི་རབས་ལམ་འདི་ལ་ཞུགས་པ་ཐམས་ཅད་དོ།། །།
༄། །གྲོལ་བར་བྱེད་པ་སྒྲུབ་ཐབས་ལ། བཏགས་པའི་དཀྱིལ་འཁོར་དུ་བླ་མ་སྤྲུལ་པའི་སྐུར་སྒྲུབ་པ།
གཉིས་པ་ལ། སྨིན་པར་བྱེད་པ་
དབང་། གྲོལ་བར་བྱེད་པ་སྒྲུབ་ཐབས། གེགས་སྲུང་བར་བྱེད་པ་དམ་ཚིག བོགས་འདོན་པར་བྱེད་བ་སྤྱོད་པ་བཞི་ལས། དང་པོ་གཞན་དུ་བཤད་ལ། གཉིས་པ་ལ། བཏགས་པའི་དཀྱིལ་འཁོར་དུ་བླ་མ་སྤྲུལ་
པའི་སྐུར་སྒྲུབ་པ། ལུས་ཀྱི་དཀྱིལ་འཁོར་དུ་བླ་མ་ལོངས་སྦྱོད་རྫོགས་པའི་སྐུར། བྷ་གའི་དཀྱིལ་འཁོར་དུ་བླ་མ་ཆོས་ཀྱི་སྐུར། བྱང་ཆུབ་སེམས་ཀྱི་དཀྱིལ་འཁོར་དུ་བླ་མ་ངོ་བོ་ཉིད་ཀྱི་སྐུར་སྒྲུབ་པའོ། །
10-242
དང་པོ་ལ། ཆོས་ཉིད་རང་བཞིན་གྱི། ཆོས་ཅན་ལྷ་དང་ལྷ་མོའི། སོ་སོ་རང་གི་དག་པ་བསྒོམ་པ་གསུམ་ལས། དང་པོ་ནི། དཔལ་བདེ་མཆོག་ལས། བླ་མེད་མཛད་པའི་སློབ་དཔོན་ནི། །རྡོ་རྗེ་
སེམས་དཔའ་རབ་མཆོད་ན། །དེ་ཡིས་བསོད་ནམས་མ་བྱས་ཤིང་། །དཀའ་ཐུབ་མ་བརྟེན་ཅི་ཞིག་ཡོད། ཅེས་དང་། ཨཱརྱ་དེ་ཝས། སློབ་དཔོན་ལྷ་ཡི་མཆོག་ཡིན་ཏེ། །འབད་པས་མཆོད་པར་བྱ་བ་ཡིན། །དེ་ཉིད་
རྡོ་རྗེ་འཛིན་རྒྱལ་པོ། །མངོན་སུམ་གཟུགས་ཀྱི་རྣམ་པར་གནས། །ཞེས་དང་། ལེགས་སྨིན་ཀ་རས། རྡོ་རྗེ་སེམས་དཔའདིར་ཤེས་བྱ། །སངས་རྒྱས་ཐམས་ཅད་ཕྱག་བྱ་ན། །སློབ་དཔོན་ལྷ་ཡི་མཆོག་ཡིན་ཏེ། །རབ་ཏུ་
འབད་དེ་མཆོད་བྱའོ། །ཞེས་གསུངས་པ་དང་། ཨནྡྲ་བྷཱུ་ཏིས། བརྟུལ་ཞུགས་ཅན་གྱི་བླ་མ་མཆོག །དེ་མཉམ་འགྲོ་བ་འཇིག་རྟེན་ན། །ཁམས་གསུམན་ནི་གཞན་མེད་དེ། །རྡོ་རྗེ་སེམས་ཉིད་འཇིག་རྟེན་ན། །ཕུན་སུམ་
ཚོགས་ཉིད་ཕྱིར་བཞུགས་ཡིན། །ཞེས་བཤད་པས། བླ་མ་རྡོ་རྗེ་སེམས་དཔའ་ཉིད་དུ་ངེས་པ་བརྟན་པོ་བཅངས་ནས་བསྒྲུབ་པ་འདི་ལ་འཇུག་པར་བྱའོ། །དེ་ཡང་། ཡིད་དང་རྗེསུ་མཐུན་པའི་གནསུ་བདེ་བའི་སྟན་
ལ་ལུས་དྲང་པོར་བསྲངས་ཏེ། སྐྱབས་སུ་འགྲོ་བ་བཞི་བྱས་ནས། སེམས་ཅན་ཐམས་ཅད་མི་ཟད་པའི་སྡུག་བསྔལ་དང་ཕྲལ་ནས། མི་གནས་པའི་མྱ་ངན་ལས་འདས་པ་ལ་འགོད་པའི་ཕྱིར། བླ་མ་རྡོ་རྗེ་སེམས་དཔའི་བསྒྲུབ་པ་ལ་འཇུག་པར་བྱའོ་སྙམ་དུ་སྨོན་པ་དང་། 
10-243
འཇུག་བའི་སེམས་བསྐྱེད་པ་འདི་ལྟར་དུ་བྱ་སྟེ། ཚད་མེད་བ་བཞིས་སྙིང་རྗེ་ཆེན་བོ་མངོན་དུ་བྱས་ཏེ། ཨོཾ་སྭ་བྷ་ཝ་ཤུདྡྷ་སརྦ་དྷརྨཱ་སྭ་བྷཱ་ཝ་ཤུདྡྷོ྅ཧཾ། ཞེས་བཟླ་ཞིང་། ཕུང་བོ་བདག་མ་
ཡིན་པ་བཞིན་དུ་བདག་ཀྱང་ཕུང་པོ་མ་ཡིན། ཕུང་པོ་དང་ལྡན་པ་ཡང་མ་ཡིན། ཕུང་པོ་དང་འདུ་བ་ཡང་མ་ཡིན། བུམ་པ་དང་ཆུ་བཞིན་རྟེན་དང་བརྟེན་པའི་དངོས་པོར་ཡང་མེད་ལ།
འབྲས་དང་ཕོལ་མིག་ལྟ་བུར་ཉེ་བ་ཡང་མེད་པས་མི་བདེན་པ་ལ་སྒྲོ་བཏགས་པ་ཙམ་དུ་ཟད་པའི་ཕྱིར། བདག་ནི་རྣམ་པ་ཐམས་ཅད་དུ་མེད་པ་ཉིད་དོ་ཞེས་ངེས་པར་བྱས་ནས། ཕུང་
པོ་དང་ཁམས་དང་། སྐྱེ་མཆེད་ཀྱིས་བསྡུས་པ་ཐ་དད་པའི་ཆོས་སུ་སྣང་བ་ཐམས་ཅད་རང་དང་། གཞན་དང་། གཉིས་ཀ་དང་། རྒྱུ་མེད་པ་ལས་སྐྱེ་བ་ནམ་ཡང་མི་འཐད་པས། འགག་པ་ཡང་མི་
འཐད། སྐྱེ་འགག་དང་བྲལ་བ་ལ་སུ་ཞིག་གནས་ཏེ། དེ་བས་ན་སྐྱེ་བ་དང་། འགག་པ་དང་གནས་པ་དང་བྲལ་བའི་ཕྱིར། ཆོས་ཐམས་ཅད་ནི་རྟེན་ཅིང་འབྲེལ་པར་འབྱུང་བ་ལས་བྱུང་བ་སྒྱུ་
མ་ལྟ་བུའོ་ཞེས་ངེས་བར་བལྟ་བའི་ཤེས་རབ་ཀྱི་མིག་དྲང་པོས་ཞིབ་མོར་བརྟགས་པས་མཐར་ཅི་ཡང་གྲུབ་པ་མ་རྙེད་པས། ཆོས་ཐམས་ཅདརབ་ཏུ་མི་གནས་པར་གྲུབ་སྟེ། དེའི་རྒྱུན་ལ་ཡང་དང་ཡང་དུ་བསླན་པས་སེམས་རྩེ་གཅིག་པའི་ཏིང་ངེ་འཛིན་བརྟན་པར་འགྱུར་རོ། །
10-244
ཆོས་ཐམས་ཅད་ཀྱི་རང་གི་ངོ་བོ་ཕྱིན་ཅི་མ་ལོག་པ་འདི་ཡིན་པའི་ཕྱིར་ཆོས་ཉིད་རང་བཞིན་གྱིས་དག་པ་ཞེས་བྱའོ།། །། གཉིས་པ་ནི། མཻ་ཏྲི་ཞབས་ཀྱིས་རྟེན་ཅིང་འབྲེལ་འབྱུང་ཙམ་གྱི་ཕྱིར།
བདེན་ཉིད་མ་ཡིན་སྟོང་བ་ནི། །གསལ་བ་ལྷ་ཡི་རྣམ་པ་ཡང་། །རང་བཞིན་མེད་པའི་རང་བཞིན་ཏེ། །ཞེས་གསུངས་པས། རྣམ་པར་མི་རྟོག་པའི་ཏིང་ངེ་འཛིན་དེ་ཉིད་གཟུགས་བརྙན་བཞིན་དུ་གསལ་བར་
སྣང་བ་ལྷའི་ང་རྒྱལ་གྱིས་བདེ་བ་ཆེན་པོར་ལྡང་བ་འདི་བྱ་སྟེ། སྟོང་བ་ཉིད་ཨེ་ཡིག་གི་རང་བཞིན་ཡོངསུ་གྱུར་པའི་ཆོས་འབྱུང་། འབྱུང་བ་རིམ་བརྩེགས་རི་རབ་པདྨ་རྭ་གུར་དང་བཅས་པའི་
སྣ་ཚོགས་རྡོ་རྗེའི་གཞིར་ཡེ་ཤེས་ལྔའི་རང་བཞིན་གྱི་གཞལ་ཡས་ཁང་གྲུ་བཞི། སྒོ་བཞི་རྟ་བབས་བཞི་དང་ལྡན་པ། འདོད་སྣམ། ཕ་གུ། དྲ་བ། དྲ་ཕྱེད། ཤར་བུ། བྱ་འདབ། པུ་ཤུ། དབུས་འཕྱུར་
བུ་རིན་པོ་ཆེའི་ཏོག་གིས་བརྒྱན་པ། པདྨ་ལ་གནས་པའི་ཆོས་ཀྱི་འཁོར་ལོ། རི་དགས། གདུགས་ལ་སོགས་པས་སྤྲས་པའི་ནང་སྣ་ཚོགས་པདྨ་འདབ་མ་ལྔ་པའི་ལྟེ་བ་ལ། གེ་ཆེན་པོ་བརྒྱད་ཀྱིས་
བཏེག་པའི་རིན་པོ་ཆེའི་ཁྲི། པདྨ་ཟླ་ཉི་བརྩེགས་པའི་གདན་ལ། རང་གི་སེམས་རྒྱུ་དུས་ཀྱི་བླ་མ་རྡོ་རྗེ་སེམས་དཔའ་ཐོག་མ་དང་ཐ་མ་མེད་པའི་ཀུན་ཏུ་བཟང་པོ་བརྟན་གཡོ་ཐམས་ཅད་ཀྱི་ཁྱབ་བདག་ཏུ་གྱུར་པ་དེ་ཉིད། 
10-245
ཐུགས་རྗེ་ཆེན་བོའི་དབང་གིས་ཁམས་གསུམ་གྱི་སྲིད་པ་ན་འགྲོ་བའི་དོན་མཛད་པའི་ཕྱིར་ཧཱུཾ་ཡིག་གིས་སྤྲུལ་པའི་འབྲས་བུའི་བླ་མ་རྡོ་རྗེ་འཆང་རིགས་ཐམས་ཅད་ཀྱི་བདག་པོ་བལྟ་བས་ཆོག་མི་
ཤེས་པར་མཛེས་པའི་མཚན་དཔེས་སྨྲས་པའི་སྐུ་ཨིནྡྲ་ནཱི་ལ་བཅག་པའི་འཕྲོ་ལྟར་སྔོ་བ། ཤིན་ཏུ་ཞི་ཞིང་འཛུམ་བ། རལ་བའི་ཟུར་ཕུད་ལ་སྣ་ཚོགས་རྡོ་རྗེ་དང་ཟླ་བ་ཕྱེད་པ་འཛིན་པ།
རིན་པོ་ཆེའི་ཅོད་པན་ལ་སོགས་པའི་རྒྱན་དང་། ཕྱག་རྒྱ་དྲུག་གིས་བརྒྱན་པ། དར་གྱི་སྟོད་གཡོགས་དང་ཤམ་ཐབས་ཅན། རྡོ་རྗེ་སྙེམས་མ་དམར་མོ་མཛེས་སྡུག་གི་ཕུལ་དུ་བྱོན་པ་བཅུ་དྲུག་པའི་
ལང་ཚོ་ཅན་ཕྱོགས་ཀྱི་གོས་མ་ཕྱག་རྒྱ་ལྔས་བརྒྱན་ཅིང་གྲི་ཐོད་འཛིན་པ་ལ། རྡོ་རྗེ་དང་དྲིལ་བུ་བསྣམས་པའི་ཕྱག་གིས་འཁྱུད་དེ་རྡོ་རྗེ་སྐྱིལ་མོ་ཀྲུང་གིས་འོད་ཀྱི་འཕྲེང་བ་འཁྲིགས་པའི་
དབུས་ན་བཞུགས་པར་གྱུར། མདུན་གྱི་འདབ་མ་ནས་གཡས་སྐོར་དུ། གྱད་དང་། གླང་བོ་ཆེ་དང་། རྟ་དང། རྨ་བྱ་དང་། ཤང་ཤང་གིས་བཏེག་པའི་རིན་པོ་ཆེའི་ཁྲི་པད་ཉིའི་གདན་ལ་གཙོ་བོའི་སྐུ་
ལས་འཕྲོས་པའི་ཨོཾ་ཡིག་ལས་རྣམ་པར་སྣང་མཛད་ཡབ་ཡུམ་དཀར་པོ། །ཧཱུཾ་ལས་མི་བསྐྱོད་པ་ཡབ་ཡུམ་སྔོན་པོ། ཏྲཱཾ་ལས་རིན་འབྱུང་ཡབ་ཡུམ་སེར་པོ། ཧྲཱིཿལས་འོད་དཔག་མེད་ཡབ་ཡུམ་དམར་པོ། ཨཱཿལས་དོན་གྲུབ་ཡབ་ཡུམ་ལྗང་ཁ། 
10-246
ཡབ་རྣམས་རྡོ་རྗེ་དང་དྲིལ་བུ་འཛིན་པས། ཡུམ་གྲི་ཐོད་འཛིན་པ་ལ་འཁྱུད་པ། འཁོར་ལོས་སྒྱུར་བ་བཞིན་དུ་རྒྱན་ཐམས་ཅད་ཀྱིས་བརྒྱན་ནས་གཙོ་བོ་ལ་འདུད་པའི་ཚུལ་གྱིས་རྡོ་རྗེའི་སྐྱིལ་ཀྲུང་
གིས་བཞུགས་པའོ། །ལྷ་དེ་ཐམས་ཅད་ཀྱིསྤྱི་བོར་ཨོཾ། མགྲིན་པར་ཨཱཿ སྙིང་གར་ཧཱུཾ། དེ་དག་ལས་འོད་འཕྲོས། དཔའ་བོ་དང་རྣལ་འབྱོར་མས་བསྐོར་བའི་ཡེ་ཤེས་ཀྱི་དཀྱིལ་འཁོར་སྟེང་གི་ནམཁར་ཕེཾ། ཛཿཧཱུཾ་བཾ་
ཧོཿ དམ་ཚིག་གི་འཁོར་ལོ་དང་གཉིས་སུ་མེད་པར་གྱུར། དེ་ནས་མདུན་གྱི་ནམཁར་སྟོང་པ་ཉིད་ཨེ་ཡིག་ནས་ཡེ་ཤེས་སེམས་དཔའ་བསྟིམ་པའི་བར་སྔར་བཞིན་ལ། ཐུགས་ཀའི་འོད་ཟེར་གྱིས་དབང་གི་
ལྷ་ཚོགས་སྤྱན་དྲངས། དེ་རྣམས་ཀྱིས་རིན་པོ་ཆེའི་བུམ་པ་བདུད་རྩིས་གང་བས་མདུན་བསྐྱེད་ཀྱི་ལྷ་ལ་དབང་བསྐུར། སྐུ་གང་། དྲི་མ་དག །ཆུ་ལྷག་མ་སྤྱི་བོར་འཁྱིལ་བ་ལས། གཙོ་འཁོར་ཐམསཅད་ལ་
རྡོ་རྗེ་སེམས་དཔའ་དཀར་པོས་དབུ་བརྒྱན་པར་གྱུར། དེ་ནས། དྲི་བཟང་པོས་བགོས་པའི་མནྜལ་མེ་ཏོག་གི་ཚོམ་བུ་ཅན། སངས་རྒྱས་ཀྱི་ཞིང་ཇི་ལྟར་གདམ་པར་འདོད་པ་དེ་ལྟ་བུའི་ཡོན་ཏན་ཅན་
དུ་དམིགས་པ་ཕུལ་ཏེ། ཞིང་གི་རྡུལ་ཇི་སྙེད་པའི་གྲངས་དང་མཉམ་པར་མོས་པའི་ལུས་ཀྱིས་ཕྱག་བྱ། ཕྱི་ནང་གསང་དེ་ཁོ་ན་ཉིད་ཀྱིས་མཆོད་ཅིང་། བཤགས་པ་དང་། ཡི་རང་བ་དང་། བསྐུལ་བ་དང་། 
10-247
གསོལ་བ་དང་། བསྔོ་བའི་བར་བྱས། བསྟོད་པས་བསྟོད། མཎྜལ་སྔོན་དུ་འགྲོ་བས་དབང་བླང་། ཕར་ཐིམ་ཕོད་བ་ཚུར་འབྲལ་མི་བཟོད་པའི་གདུང་བས་བླ་མ་སྤྲུལ་བའི་སྐུ་ལ་གསོལ་བ་བཏབ། འདོད་པའི་དངོས་
གྲུབ་ཞུས་ནས། བདག་ལ་ཐིམ་པར་མོས་ཏེ་བདག་ཉིད་དཀྱིལ་འཁོར་གྱི་འཁོར་ལོ་གསལ་སྣང་མ་བྱུངགི་བར་དུ་བསྒོམ་པར་བྱའོ། །དེ་ལྟར་ལུས་ལ་དམིགས་པས་དུབ་ན། སྙིང་གར་ཉི་མའི་དཀྱིལ་འཁོར་ལ་
ཧཱུཾ་ཡིག་གཅིག་པུའམ། ཨོྃ་བཛྲ་གུ་རུ་ཌཱ་ཀི་ནཱི་སིདྡྷི་ཧཱུཾ། ཞེས་བསྐོར་བའི་སྔགས་འཁོར་བ་གང་རུང་ལ་དམིགས་ནས་བཟླས་པར་བྱའོ། །སྔགས་ལ་དམིགས་པས་སུན་ན། དེ་ལས་འོད་ཟེར་འཕྲོས། སེམས་ཅན་
གྱི་དོན་བྱས། སངས་རྒྱས་ཐམས་ཅད་ཀྱི་སྐུ་གསུང་ཐུགས་ཀྱི་ནུས་པ་ཅན་དུ་བྱས་བ་སླར་ལུས་ཀྱི་བ་སྤུའི་བུ་གར་ཞུགས་པའི་སྤྲོ་བསྡུལ་དམིགས་པར་བྱའོ། །དེ་ནས་མེ་ལོང་གི་དབུགས་ལྟར་དཀྱིལ་
འཁོར་ལྷ་ལ། དེ་བདག་ལ་བསྟིམ་ནས་གཙོ་བོ་ཡབ་ཡུམ་འབའ་ཞིག་གི་ང་རྒྱལ་འཛིན་པར་བྱའོ།། །། གསུམ་པ་ནི། རང་ཉིད་གཙོ་བོ་ཡབ་ཡུམ་དུ་གསལ་བའི་སྙིང་གར་རྡོ་རྗེ་སེམས་དཔའ་སྟོན་ཀའི་
ཟླ་བ་ལྟར་དཀར་ཞིང་འོད་ཟེར་གྱི་འཕྲེང་བ་དུ་མ་འཕྲོ་བ། བདུད་བཞི་ཞབས་ཀྱིས་མནན་ཅིང་ཕག་མོ་དང་གཉིསུ་མེད་པ། དེའི་ཐུགས་ཀར་པད་དཀར་འདབ་མ་བཞི་པ་ལ་རྡོ་རྗེ་ནས་འབྲས་ཙམ་བུ་གུ་ཅན་གྱི་ལྟེ་བ་ལ། 
10-248
བླ་མ་རྡོ་རྗེ་འཆང་གི་དཀྱིལ་འཁོར་རྟེན་དང་བརྟེན་པར་བཅས་པ་མིག་འབྲས་ཀྱི་ནང་དུ་གཟུགས་བརྙན་ཤར་བ་བཞིན་དམིགས་ལ་སྲོག་ཕྱིར་འགྲོ་བའི་ཚེ་རྡུལ་ཕྲ་རབ་བསགས་པའི་ཡེ་ཤེས་ཀྱི་འོད་
ཟེར་ཀྱི་འཕྲེང་བ་ལས་སྣ་ཚོགས་པའི་སྐུ་མཐའ་ཡས་པས་སེམས་ཅན་ཐམས་ཅད་རྡོ་རྗེ་སེམས་དཔར་བྱིན་གྱིས་བརླབས། འཇུག་པའི་ཚེ་ནང་དུ་འོངས་ནས་སྙིང་གའི་ལྷ་ལ་ཐེམ། གནས་པའི་ཚེ་དཀྱིལ་འཁོར་
གྱི་འཁོར་ལོ་དང་མཉམ་པ་ཉིད་དུ་ཇི་ཙམ་ཐུབ་པར་བསྡམས་ཏེ་སེམས་ཤིན་ཏུ་བརྟན་པར་གཟུང་བས། ཞག་བདུན་གྱིས་ལུས་འདར་བ་དང་། བསྐྱོད་བ་དང་། གཡོ་བ་དང་། འབེབས་པ་དང་། འཕར་བར་རང་
གིས་མངོན་སུམ་དུ་མཐོང་བར་འགྱུར་ལ། དེ་ནས་དུས་ཀྱི་རྩའི་ནང་དུ་སྣ་ཚོགས་བའི་གཟུགས་མཐོང་བར་འགྱུར་རོ། །དེ་ལ་གོམས་ནས་རྡོར་སེམས་ཀྱི་སྤྱི་བོར་ཟླ་བའི་སྟེང་དུ་མི་ཤིགས་པའི་ཐིག་
ལེ་ཟར་མའི་མེ་ཏོག་ལྟར་སྔོ་བ་ལས། བའི་འོ་མ་ལྟ་བུའི་རྒྱུན་ཉིན་མཚན་དུ་བབས་པ་སྦྱོར་མཚམས་ནས་བྱུང་སྟེ། ལྟེ་བར་རླུང་དང་མེའི་དཀྱིལ་འཁོར་སེན་མོ་ཙམ་པའི་སྟེང་དུ་པདྨ་ལ་
ཐོད་པ་བདུད་རྩིས་གང་བ། དབུས་སུ་ཨཱ་ལི་ཀཱ་ལི་ལས་ཟླ་བའི་དཀྱིལ་འཁོར་དང་ཧཱུཾ་ཡིག་གིས་བྱིན་གྱིས་བརླབས་པ་དང་འདྲེས་ནས་རླུང་གིས་མེ་སྦར། དེས་ཐོད་པའི་བདུད་རྩི་ལུད་པས་ལུས་ཐམས་ཅདཚིམ་པར་བྱས་པས་ཤིན་ཏུ་སྦྱངས་པ་ཐོབ་སྟེ། 
10-249
དེའི་རྐྱེན་གྱིས་སེམས་ལས་སུ་རུང་བའི་ཏིང་ངེ་འཛིན་བརྟན་པར་གྱུར་པས་ཁམས་གསུམ་པ་དང་། དུས་གསུམ་གྱི་དེ་བཞིན་གཤེགས་པ་རོ་གཅིག་པའི་བླ་མའི་སྐུ་རྡོ་རྗེ་སྤྲུལ་པའི་སྐུ་འཇའ་ཚོན་ལྟ་
བུར་འགྲུབ་པར་འགྱུར་རོ། །དེ་ཡང་། ཀུན་ནས་ཕྱག་དང་ཞབས་ལ་སོགས། །ཀུན་ནས་སྤྱན་དང་དབུ་དང་ཞལ། །ཀུན་ནས་སྙན་ལྡན་འཇིག་རྟེན་ན། །ཀུན་ཏུ་ཐམས་ཅད་གཡོགས་ནས་བཞུགས། །ཞེས་དཔལ་བདེ་མཆོག་ལས་
གསུངས་པ། བ་སྤུའི་བུ་ག་ཐམས་ཅད་ཀྱིས་ལེན་པའི་བྱ་བ་བྱེད་ནུས་པས་ཕྱག་ཐམས་ཅད་དུ་འགྲོ་བའི་བྱ་བ་བྱེད་ནུས་པས་ཞབས། ཐམས་ཅད་ཀྱིས་གཟིགས་པས་སྤྱན། ཐམས་ཅད་ཀྱིས་ཞལ་དང་དབུའི་
བྱ་བ་བྱེད་པས་ཞལ་དང་དབུ་། གང་གིས་ཀྱང་མི་གསན་པའི་ཆ་མེད་པས་སྙན་ཏེ་བརྟན་གཡོའི་འཇིག་རྟེན་ཐམས་ཅད་དེའི་རང་བཞིན་དུ་རོ་གཅིག་པར་མཛད་པས་ཐམས་ཅད་གཡོགས་ནས་བཞུགས་པ་ཞེས་
བྱའོ། །དེ་ནི་བུམ་དབང་གི་ཉམས་ལེན་ཀུན་རྫོབ་ཀྱི་བདེན་པ་སྒྲུབ་པའི་ཐབས་སོ།། །།
༄། །ལུས་ཀྱི་དཀྱིལ་འཁོར་དུ་བླ་མ་ལོངས་སྦྱོད་རྫོགས་པའི་སྐུར་སྒྲུབ་པ།
གཉིས་པ་ལུས་ཀྱི་དཀྱིལ་འཁོར་དུ་བླ་མ་ལོངས་སྤྱོད་རྫོགས་པའི་སྐུར་བསྒྲུབ་པ་ལ། རྒྱུད་ཀྱི་རིམ་པ། སྔགས་ཀྱི།
ཡེ་ཤེས་ཀྱི་གསང་བའི་རིམ་པ་བཞི་ལས། དང་པོ་ནི། མངོན་བརྗོད་བླ་མ་ལས། །དཀྱིལ་འཁོར་ལུས་སུ་བཤད་པ་སྟེ། །དཀྱིལ་འཁོར་བྷ་ག་ཡིན་པར་བཤད། །དཀྱིལ་འཁོར་བྱང་ཆུབ་སེམས་ཡིན་ཏེ། །དཀྱིལ་འཁོར་གསུམ་དུ་གསུངས་པའོ། །
10-250
ཞེས་དང་། དམ་པ་དང་བོར། ལུས་ཀྱི་དབང་པོ་བྷ་ག་སེམས། །དཀྱིལ་འཁོར་རྣམ་པ་གསུམ་དུ་འགྱུར། །གཞན་པ་ཚོན་ལྔ་ལྡན་པ་མིན། །ཞེས་གསུངས། དང་པོ་གཉིས་དོན་དམ་བསྒྲུབ་པའི་ཐབས་གསང་བ་དང་
ཤེས་རབ་ཀྱི་ཉམས་ལེན་ལྷག་མ་བཞི་པའི་སྟེ་ཟུང་འཇུག་གི་སྒྲུབ་ཐབས་སོ། །དེ་ལས་ལུས་ཀྱི་དཀྱིལ་འཁོར་ནི་སམྦུ་ཊར། ཧེ་རུ་ཀ་ལ་སོགས་བའི་ལྷ། །རྩ་གཟུགས་མཛེས་པར་ཡང་དག་བྱུང་། །ལུས་
ཀྱི་དཀྱིལ་འཁོར་ཉམས་དགའ་བར། །སྒོ་བཞི་ཇི་སྐད་གསུངས་པའོ། །ཞེས་བཤད་པའི་དོན་བསྒོམ་པ་འདི་ལྟར་དུ་བྱ་སྟེ་། རྐང་པ་གཉིས་བགྲད་པ་གཞུའི་དབྱིབས་རླུང་། སུམ་མདོ་གྲུ་གསུམ་མེ། ལྟོ་བ་ཟླུམ་པོ་
ཆུ། བྲང་གྲུ་བཞིས། སྒལ་ཚིགས་རིའི་རྒྱལ་པོ་རི་རབ། མགོ་བོ་རི་རབ་ཀྱི་སྟོད་ཀྱི་ཆ། རྩིབ་མ་རྭ་གུར། ལུས་འདོམ་གང་གྲུ་བཞི་མཉམ་པ་གཞལ་ཡས་ཁང། སྐུ་གསུང་ཐུགས་གནད་འབྱེད་པ་སྒོ་
བཞི། སྣ་རྩེ་བཞི་རྟ་བབས། རྐང་བརྒྱད་ཀ་བ། ཕུང་བོ་ལྔའི་རླུང་རྩིག་པ། འདོད་ཡོན་ལྔ་སྣམ་བུ་ཁམས་ལྔ་ཕ་གུ །རྒྱུ་མ་དང་རྒྱུས་པ་དྲ་བ་དྲ་ཕྱེད། ལྕེ་ཆུང་ཤར་བུ། ཨོག་སྐོ་
བྱ་འདབ། སོ་པུ་ཤུ། ཀླད་པ་དང་ཀླད་རྒྱས་དབུས་འཕྱུར་བུ་རྟོག་བཅས། མིག་སོགས་དབང་པོ་དང་རྣམ་ཤེས་དྲུག་ཆོས་ཀྱི་འཁོར་ལོ་དང་རི་དྭགས་ལ་སོགས་པའི་རྒྱན་ཏེ་རྟེན་ལུས་ཀྱི་དཀྱིལ་འཁོར། 
10-251
དེའི་དབུས་སུ་བརྟེན་པ་རྩེ་གསུམ་འཁོར་ལོ་བཞི་དང་བཅས་བའི་སྤྱི་བོ་བདེ་ཆེན་གྱི་འཁོར་ལོའི་ཉི་ཟླ་སྒྲ་གཅན་གསུམ་གཅིག་ཏུ་འདྲེས་པའི་རྩ་ཡུམ། དེའི་ནང་དུ་སོན་པའི་རྩ་ཡིག་ཧཾ་མགོ་
མེད་ཐིག་ལེས་བརྒྱན་པ་བྱང་སེམས་ཀྱི་ཡེ་ཤེས་དང་རོ་གཅིག་པ་བླ་མའི་སྐུ་རྡོ་རྗེ། ཕྱི་རོལ་ཏུ་དབྱངས་བཅུ་དྲུག་ཟླ་བྱེད་ཐིག་ལས་མཛེས་པ་དཔའ་བོ། དེ་ལ་འཁྱུད་པའི་རྩ་འདབ་སུམ་
ཅུ་རྩ་གཉིས་དཔའ་མོ། སྙིང་ག་ཆོས་ཀྱི་འཁོར་ལོར་རོ་བརྐྱང་ཨ་བ་དྷཱུ་ཏཱི་གསུམ་འདྲེས་པའི་རྩ་ཡུམ། དེའི་ནང་གི་རྩ་ཡིག་ཧཱུཾ་ཁ་བ་འཛག་པ་བླ་མའི་ཐུགས་རྡོ་རྗེ། ཕྱི་རོལ་གྱི་
ཕྱོགས་སུ། ཨ་ཨི་ཨུ་ཨེ། མཚམས་སུ། ཡ་ར་ལ་ཝ་བརྒྱད་དཔའ་བོ། དེ་ལ་འཁྱུད་པའི་རྩ་འདབ་བརྒྱད་དཔའ་མོ། ཐབས་ཀྱི་འཁོར་ལོ་དེ་གཉིས་དཀར་པོ་ཡིག་འབྲུ་དང་བཅས་པ་ཆུ་ཤིང་གི་
མེ་ཏོག་ལྟར་ཁ་འོག་ཏུ་ཕྱོགས་པ། མགྲིན་པ་ལོངས་སྤྱོད་ཀྱི་འཁོར་ལོ་རྡུལ་མུན་སྙིང་སྟོབས་གསུམ་གཅིག་ཏུ་འདྲེས་པའི་རྩ་ཡུམ། དེའི་ནང་གི་རྩ་ཡིག་ཨོཾ་དངོས་པོ་འབྱིན་པ་དང་སྡུད་པར་བྱེད་
པ་བླ་མའི་གསུང་རྡོ་རྗེ། ཕྱིའི་ཕྱོགས་སུ། ཨཱ་ཨཱི། ཨཱུ་ཨཻ། མཚམས་སུ། རྀརཱྀ་ལྀ་ལཱྀ་ཡི་གེ་དཔའ་པོ། དེ་ལ་འཁྱུད་པའི་རྩ་འདབ་མ་བཅུ་དྲུག་དཔའ་མོ། །ལྟེ་བ་སྤྲུལ་བའི་འཁོར་ལོར། ལུག་དང་སེར་སྐྱ་ཡིད་བཟངས་མ་གཅིག་ཏུ་འདྲེས་པའི་རྩ་ཡུམ། 
10-252
དེའི་ནང་གི་ཡི་གེ་ཨཾ་དངོས་པོ་འབྱིན་སྡུད་བྱེད་པ་བླ་མའི་ཡེ་ཤེས་རྡོ་རྗེ། ཕྱི་རོལ་གྱི་ཨ་ཀ་ཙ་ཊ་ཏ་བ་ཡ་ཤ་བརྒྱད་དཔའ་བོ། །དེ་ལ་འཁྱུད་པའི་རྩ་འདབ་དྲུག་ཅུ་
རྩ་བཞི་དཔའ་མོ། །ཤེས་རབ་ཀྱི་འཁོར་ལོ་འདི་གཉིས་དམར་པོ་ཁ་གྱེན་དུ་ཕྱོགས་པ། ལྟེ་འོག་སུམ་མདོར་བཤར་གཅི་ཁུ་བ་འབབ་པ་གསུམ་གཅིག་ཏུ་འདྲེས་པའི་རྩ་གཟུགས་ཨ་ཤད་མེ་རོའི་རི་
མོ་རྡོ་རྗེ་སྙེམས་མ་སྟེ་ཀྵ་ཡིག་གདན་དུ་བྱས་པ་རྩ་གསུམ་ཡར་སྤྱི་བོ་ནས་སོ་སེར་གྱེས་ཏེ་དབུས་མ་སྨིན་མཚམས་དང་གཞན་གཉིས་སྣ་སྒོར་ཟུག་པ། རླུང་ལྡང་བ་ཨ་ཡིག་གི་རང་
བཞིན་ཨ་ཤད་ལས་བྱེ་ནས་གཡས་ཀྱི་ཆ་འབའ་ཞིག་ལ་བརྟེན་ཏེ། འཁོར་ལོ་བཞིའི་ལྟེ་བ་ཕུག་སྟེ་དབུས་ཀྱི་ཡི་གེ་ལ་ལན་གསུམ་བསྐོར་ཏེ་སྤྱི་བོ་ནས་གསེར་སྒོ་རྒྱུད། སྣའི་རྩེར་འཐོན་པའི་
ཚུལ་གྱིས་མས་ཡར་གསལ་བཏབ་། འཇུག་པ་ཨོཾ་གྱི་རང་བཞིན་སྣ་གཡོན་ནས་ཞུགས་ཏེ་གཡོན་འབའ་ཞིག་བརྒྱུད་ཡི་གེ་ལ་བསྐོར་ནུས་ཨ་ཤད་ཀྱི་གནས་ཚུན་དུ་འོངས་པ་ལས་མར་གསལ་བཏབ་། གནས་པ་
ཧཱུཾ་ཡིག་གི་རང་བཞིན་ཨ་ཤད་དང་རོ་གཅིག་ཏུ་འདྲེས་པས་ཐམས་ཅད་མིག་ལ་གཟུགས་སྣང་བ་བཞིན་དུ་བསྒོམ་པར་བྱའོ།། །། གཉིས་བསྔགས་ཀྱི་རིམ་པ་ནི། རྐང་པ་རྡོ་རྗེ་སྐྱིལ་ཀྲུང་ལག་པ་མཉམ་གཞག་ལྟེ་འོག་ཏུ་བཅར་བའི་གྲུ་མོས་རོ་རྐྱང་གཉིས་དྲག་ཏུ་གཅུན། 
10-253
མིག་ཐད་ཀར་གཏད་དེ་ཉི་ཟླའི་རླུང་གཉིས་སྣའི་སྒོ་གཉིས་ནས་ཞུགས་ལྟེ་འོག་ཏུ་འོངས་པ་དང་། ཐུར་སེལ་སྟེང་དུ་སླེབ་པ་དང་འདྲེས་ནས་ཀྵ་ཡིག་གི་ནང་དུ་ཞུགས་རྡོ་རྗེ་སྙེམས་མ་སད་
པར་བྱས་པས་དེ་དེ་ཉིད་དུ་དུ་བར་འཐུལ་ཞིང་འབར་བས་ལྟེ་བའི་འཁོར་ལོ་ཕུག །དམ་ཚིག་དང་། ཆོས་དང་། ལོངས་སྤྱོད་དང་། བདེ་ཆེན་གྱི་འཁོར་ལོའི་ལྷ་མོ་དམ་ཚིག་གི་གཟུགསུ་གནས་པ་ལ་
ཡེ་ཤེས་པའི་རང་བཞིན་དུ་ཞུགས་ནས་བཅོམ་ལྡན་འདས་རྣམས་དང་སྙོམས་པར་འཇུག་པ་ཡང་དང་ཡད་དུ་བསམ་མོ།། །། གསུམ་པ་ཡེ་ཤེས་ཀྱི་རིམ་པ་ནི། བཅོམ་ལྡནའདས་མ་དེས་རྣལ་འབྱོར་མ་ཐམས་ཅད་
བྱིན་གྱིས་བརླབས་ནས་རང་ཉིད་ཀྱི་སྤྱི་བོ་ནས་སྨིན་མཚམས་ཀྱི་མཛོད་སྤུར་ཞུགས་ཤིང་གནད་ཀྱི་བུ་ག་བྱེ་བའི་སྒོ་ནས་བྱུང་ནས། ཕྱོགས་བཅུའི་དེ་བཞིན་གཤེགས་པ་ཐམས་ཅད་ལ་སྙོམས་འཇུག་གིས་མཆོད་
པས་དགྱེས་པ་བསྐྱེད་དེ། དེ་དག་གི་སྐུ་གསུང་ཐུགས་དབྱེར་མི་ཕྱེད་པའི་བདུད་རྩི་བླངས་ཏེ་ལུས་ཀྱི་པདྨར་བཟུང་བ་སྤྱི་གཙུག་གི་བུ་ག་ནས་བྱུང་སྟེ། གསེར་གྱི་སྒོ་ཛཱ་ལནྡྷ་རའི་མིང་ཅན་
ལས་ཞུགས་ནས་སྤྱི་བོའི་སྣ་ཚོགས་དང་རོ་གཅིག་ཏུ་འདྲེས་པས་དབང་བསྐུར་བ་མཛད་དེ་སླར་ཆུ་ལས་འོ་མ་བཞིན་དུ་བྱེ་བ་ཚུལ་དེ་ཉིད་ཀྱིས་མགྲིན་པ་དང། སྙིང་ག་དང་། ལྟེ་བའི་ལྷ་ལ་མངོན་པར་དབང་སྐུར་ནས་སུམ་མདོར་ལོག་ནས་ངལ་བསོ་བའི་དོན་དུ་གནས་པར་བལྟའོ། །
10-254
དེ་ནས་ལོངས་སྐུའི་གསོལ་འདེབས་ཀྱིས་འདོད་པའི་དངོས་གྲུབ་ཞུས་ནས་ཐམས་ཅད་ཀྱང་བདེ་བའི་རང་བཞིན་དུ་ཐིམ་པར་བསམ་མོ།། །། བཞི་པ་གསང་བའི་རིམ་པ་ནི། སྲོག་ལུས་ལ་བགག་སྟེ་བསྒོམས་པས་རླུང་
ཟིན་པའི་ཚུལ་འདི་དག་ཏུ་འགྱུར་ཏེ། ཤུགས་དང་། གྲངས་དང་། རིང་ཐུང་དང་། ཁ་དོག་དང་། ནུས་པའམ་སྟོབས་ཟིན་པའོ། །དེས་གཏུམ་མོའི་མེ་དྲོད་རྒྱས་པས་རྩ་སྣ་ཚོགས་ཀྱི་ཁ་བྱེ་བར་འགྱུར་ལ། དེར་
རླུང་ལྔས་ཐིག་ལེ་ཁྲིད་དེ་ཕྱིན་པས་རྩ་ཟུག་དང་ཐིག་ལེའི་ཟུག་ཅི་རིགས་པ་དང་། དག་པའི་རྩར་ཕྱིན་པའི་ཚེ། སངས་རྒྱས་ཀྱི་ཞིང་མཐོང་བ་དང་། མ་དག་པའི་རྩར་ཚུད་པས་དམྱལ་བ་ལ་
སོགས་པའི་གནས་སྦྱོང་འཆར་བའོ། །ཁམས་འདུས་པ་དང་པོ་དྲོད་ཀྱི་དུས་སམ་སྡུག་བསྔལ་གྱི་དུས་ཞེས་བྱའོ། །དྲོད་ཀྱིས་བསྐུལ་བས་བྱང་སེམས་རྒྱས་ཏེ་རྩའི་ཡུམ་རྣམས་ལ་སྙོམས་པར་འཇུག་པ་བྱས་པས་ལུས་
ཤིན་ཏུ་སྦྱངས་པའི་བདེ་བ་ལ་རེག་པ་ནི་གཉིས་པ་བདེ་པའི་དུས་སོ། །དེས་ནང་གི་བདེ་བ་འཕེལ་བས་ཕྱི་རོལ་གྱི་འདོད་པ་ལ་བློ་མི་འཇུག །དེའི་ཤུགས་ཀྱིས་རྣམ་པར་མི་རྟོག་པའི་
ཏིང་ངེ་འཛིན་གྱིས་སེམས་ལས་སུ་རུང་བ་གསུམ་པ་མི་རྟོག་བའི་སྐབས་སོ། །སྲོག་རྩོལ་གྱི་སྟོབས་ཀྱིས་ལས་རླུང་དབུ་མར་ཚུད་པས་དུ་སོགས་ཀྱི་རྟགས་དང་། ཡོན་པོའི་རྒྱུ་བ་ཁེགས་པས་འཆི་བ་ལྷུས་པར་འགྱུར་རོ། །
10-255
དེ་ནས་རྩའི་མདུད་པ་རྣམས་ལྷོད་པར་གྱུར་པས་སྲོག་ཐུར་གོང་བུ་གཅིག་ཏུ་འདྲེས་ནས། རྣལ་འབྱོར་གྱི་སྟོབས་དེས་རླུངཐམས་ཅད་ཐུར་སེལ་གྱི་གནས་ནས་དབུ་མར་ཚུད་པ་ལུས་འོད་ཟེར་ལྔའི་འཁོར་ལོས་
བསྐོར་བ་དང་། སོ་དང་སེན་མོ་ལ་སོགས་པ་སྙིགས་མའི་ཁམས་ཐམས་ཅད་གཏུམ་མོའི་མེས་དངས་མར་བསྒྱུར་བ་འཇའ་ཚོན་ལྟ་བུའི་ལུས་ཡོན་ཏན་བརྒྱད་ཀྱི་རྟོགས་པ་ལ་གནས་པ་དེར་འགྱུར་རོ། །དེ་
ནས་ལས་རླུང་ཉི་ཁྲི་ཆིག་སྟོང་དྲུག་བརྒྱ་དབུ་མར་ཐིམ་པས་ལྷན་ཅིག་སྐྱེས་པ་དང་། ཆོས་དང་སྤྲུལ་བའི་སྐུ་གསུམ་གཅིག་ཏུ་སྦྱོར་བའི་ལོངས་སྐུ་ཐམས་ཅད་མཁྱེན་པའི་སྐད། གཞོམ་དུ་མེད་པའི་མཚན་
ཉིད་སྒྲའི་ཚུལ་ནཱ་དའི་རང་བཞིན་སྔགས་ཀྱི་ལྷ་བླ་མའི་གསུང་རྡོ་རྗེ་ལོངས་སྤྱོད་རྫོགས་པའི་སྐུར་གྲུབ་པ་ཡིན་ནོ། །དེ་ཡང་ས་ར་ཧས། རླུང་དང་མེ་དང་དབང་ཆེན་འགག་པ་ཕན། །བདུད་རྩི་
རྒྱུ་བའི་དུས་སུ་རླུང་ནི་སེམས་ལ་འཇུག །ཅེས་གསུངས་སོ།། །།
༄། །བྷ་གའི་དཀྱིལ་འཁོར་དུ་བླ་མ་ཆོས་ཀྱི་སྐུར་སྒྲུབ་པ།
གསུམ་པ་བྷ་གའི་དཀྱིལ་འཁོར་དུ་བླ་མ་ཆོས་ཀྱི་སྐུར་བསྒྲུབ་པ་ལ། བདག་གི་བཟང་པོ། གཞན་གྱི་བཟང་པོ། དུས་ཀྱི་བཟང་པོ། ཡེ་
ཤེས་ཀྱི་བཟང་པོ་བཞི་ལས། དང་པོ་ནི། བདུད་རྩི་ལྔའི་རང་བཞིན་དུ་གྱུར་པའི་དངོས་པོ་བྱང་ཆུབ་ཀྱི་སེམས་ལོངས་སྐུའི་གོང་བུ་ཆ་ཕྲ་བ་ཐིག་ལེའི་གཟུགས་སུ་གནས་པ་དེ་ཉིད་ཐབས་བླ་མ་རྡོ་རྗེ་སེམས་དཔའ་དང་། 
10-256
དེ་ལ་བརྟེན་པའི་བདེ་བ་ཆེན་པོའི་གཟུགས་ཅན་ནི་རྡོ་རྗེ་སྙེམས་མ་སྟེ། བརྟག་གཉིས་ལས། ཁུ་བའི་རྣམ་པ་བཅོམ་ལྡན་འདས། །དེ་ཡི་བདེ་བ་འདོད་མར་བརྗོད། །ཅེས་གསུངས་ཤིང་། དེ་ལྟ་བུའི་རྡོ་
རྗེ་འཆང་དེ་ཉིད། །ཟླ་བ་ཡར་ངོ་དཀར་ཕྱོགས་ཀྱི་ཆ་བཅུ་དྲུག་པ་མཐེ་བོང་ནས་སྤྱི་བོའི་བར་དུ་དབྱངས་ལུགས་འབྱུང་གི་རང་བཞིན་ལུས་ཀྱི་གཡོན་འབའ་ཞིག་ལ་བརྟེན་ནས་འཛག་པར་བྱེད་པ་
སྙིང་རྗེ་བཅུ་དྲུག་དཔའ་པོའི་དེ་ཁོ་ན་ཉིད་དང་། མར་ངོ་ནག་ཕྱོགས་ཀྱི་ཆ་བཅུ་དྲུག་པ་སྤྱི་བོ་ནས་མཐེ་བོང་གི་བར་དུ་དབྱངས་ལུགས་ཟློག་གི་རང་བཞིན་གཡས་ལ་བརྟེན་ནས་འབབ་པར་
བྱེད་པ་སྟོང་པ་ཉིད་བཅུ་དྲུག་རྣལ་འབྱོར་མའི་དེ་ཁོ་ན་ཉིད་དང་། ཐུན་མོང་དུ་འཕོ་བ་བཅུ་དྲུག་སྟེ། ལུག །གླང་། འཁྲིག་པ། ཀརྐ་ཊ། སེང་གེ། བུ་མོ། སྲང་། སྡིག་པ། གཞུ། ཆུ་སྲིན། བུམ་
པ། ཉ། ཉི་མ་འཛིན། ཟླ་བ་འཛིན། ཐིག་ལེ་འགོག །ནམཁའ་འགོག་པ་བཅུ་དྲུག་དང་ཟླ་བའི་ཆ་སྐྱེ་བ་འཁོར་བའི་ཆ། སྟོང་པ་བཅུ་དྲུག་ཐིམ་པ་མྱང་འདས་ཀྱི་ཆ། དེ་གཉིས་ཀ་བཅོམ་པ་
འཆི་བ་མེད་པའི་བདེ་བ་མི་གནས་བའི་མྱང་འདས་སྟེར་བའི་རྒྱུར་ཤེས་པར་བྱས་ནས། རྣལ་འབྱོར་པ་རང་ཉིད་བཅོམ་ལྡན་འདས་དང་། བཾ་ཡིག་གིས་བྱིན་གྱིས་བརླབས་པའི་ཧ་སྟའི་བཅོམ་ལྡན་འདས་མ་ཁ་སྦྱོར་བས་ཕན་ཚུན་འཁྱུད་དེ་འོ་བྱེད་པའི་རྡོ་རྗེ་ལུ་གུ་རྒྱུད་བཅིངས་ནས་རྡོ་རྗེ་པདྨར་སྩལ་བའི་ཞགས་པས་བསྐྱོད་ཅིང་རྗེས་སུ་ཆགས་པའི་ལྕགས་ཀྱུས། 
10-257
དེ་བཞིན་གཤེགས་པ་ཐམས་ཅད་བདག་ཉིད་ཀྱི་འཁོར་ལོ་བཞིའི་བྷ་ག་པདྨའི་དཀྱིལ་འཁོར་ལ་གནས་པའི་རྡོ་རྗེ་འཛིན་པ་ཡབ་ཡུམ་དང་རོ་གཅིག་ཏུ་བྱས་པ་གཏུན་ཤིང་གིས་བསྣུན་པས་ཕུང་པོ་ཁམས་
དང་སྐྱེ་མཆེད་ཀྱིས་བསྡུས་པ། རྒྱུ་བ་དང་མི་རྒྱུ་བའི་འཇིག་རྟེན་གསུམ་དང་ལྷན་ཅིག་ཞུ་བ་རྡོ་རྗེའི་རང་བཞིན་བྱང་ཆུབ་ཀྱི་སེམས་འཛག་མེད་དུ་འཛིན་པའི་བདེ་བ་བདག་ཉིད་བྱ་སྟེ། གཉིས་
སུ་མེད་པའི་རང་བཞིན་དེ་ཉིད་བསྒོམ་མོ། །དེ་ཡང་རྡོ་རྗེ་མཁའ་འགྲོར། བདག་གི་དེ་ཉིད་རྡོ་རྗེ་འཛིན། །བདག་གི་དབུས་སུ་ཚུད་བྱས་ནས། །འཁོར་ལོ་ཅན་ཀུན་བསྡུ་བར་བྱ། །ཐམས་ཅད་རྡོ་རྗེའི་
རང་བཞིན་དུ། །བྱས་ནས་དེ་ཚེ་རྣམ་པར་བསྒོམ། །ཞེས་གསུངསོ།། །། གཉིས་པ་གཞན་གྱི་བཟང་པོ་ནི། །ཡོན་ཏན་གྱི་ངང་མོ་ཐམས་ཅད་འདུས་པའི་པདྨ་ཅན་ལང་ཚོ་ལ་གནས་པ་ལེགས་པར་སྦྱངས་པའི་པདྨའི་
དཀྱིལ་འཁོར་དུ་མཉམ་པར་སྦྱར་བའི་འདོད་ཆགས་ཆེན་པོས་སངས་རྒྱས་ཐམས་ཅད་བསྡུས་ནས་བྱང་ཆུབ་ཀྱི་སེམས་སུ་བཞུ་བ་ནོར་བུར་ཚུད་པའི་ཤེས་རབ་ཀྱི་རྩ་ཆོས་ཀྱི་དབང་ཕྱུག་མའི་ཟེའུ་འབྲུར་སྤྲོས་
པའི་དགའ་བ་ནི་རྡོ་རྗེ་འཛིན་པ་སྟེ་། དེ་ཡང་། ཤེས་རབ་ཀྱི་དངས་མས་ཟིན་པའི་དུས་སུ་རྙེད་པའི་མཆོག་ཏུ་དགའ་བའི་ཡུམ་གྱིས་འཁྱུད་པའི་ཐབས་ཤེས་ཀྱི་དཀྱིལ་འཁོར། དེ་བཞིན་དུ་ཁམས་གསུམ་པོ་ཐམས་ཅད་དེ་ཁོ་ན་ལྟར་བྲི་བ་སྟེ་བསྒོམ་བར་བྱའོ། །
10-258
རྡོ་རྗེ་མཁའ་འགྲོར། འཁོར་ལོ་ཅན་ཀུན་བསྡུས་ནས་ནི། །བཙུན་མོའི་བྷ་གར་བདེ་ཆེན་སྤྲོ། །དེར་ནི་དཀྱིལ་འཁོར་ཀུན་ཏུ་བྲི། །གཞན་གྱི་དེ་ཉིད་ཇི་བཞིན་གསུངས། །ཞེས་དང་། དགའ་བ་དང་པོ་དཔའ་བོ་
ཉིད། །མཆོག་ཏུ་དགའ་བ་རྣལ་འབྱོར་མ། །ཞེས་དང་། མངོན་བརྗོད་བླ་མར་ཡང། །ཧེ་རུ་ཀ་དཔལ་ཡེ་ཤེས་ཆེ། །ཕག་མོའི་ལུས་ལས་བྱུང་བ་ཡི། །བྷ་ག་པདྨའི་དཀྱིལ་འཁོར་རོ། །དེ་ལ་དཀྱིལ་འཁོར་འདུས་
པ་སྟེ། །དཀྱིལ་འཁོར་བདེ་བའི་ཡི་གེ་སྟེ། །དཀྱིལ་འཁོར་དཔའ་བོ་རྣལ་འབྱོར་མ། །ཁ་སྦྱོར་གཉིས་སུ་མེད་པ་ཉིད། །ཅེས་གསུངས་པའི་དོན་ནོ།། །། གསུམ་པ་དུས་ཀྱི་བཟང་པོ་ནི། །ནོར་བུར་སླེབ་པའི་བྱང་
ཆུབ་ཀྱི་སེམས་ཆ་བཅོ་ལྔ་པ་ཆགས་པའི་ཕྱོགས་ཕྱི་མོའི་ཕྱེད་ཅེས་བྱ་སྟེ་ལོངས་སྤྱོད་རྫོགས་པ་དང་། དེ་ནུབ་ནས་བྷ་གར་སོན་པ་ཁྲག་ཆགས་པ་དང་བྲལ་བའི་རང་བཞིན་སངས་རྒྱས་དང་བྱང་
ཆུབ་སེམས་དཔའ་ཐམས་ཅད་སྐྱེད་པར་བྱེད་པ་བརྒྱལ་བ་ཞེས་བྱ་བ་སྤྲུལ་པའི་སྐུ་དང་། ཆགས་པ་དང་ཆགས་བྲལ་འདྲེས་པ་ནོར་བུར་འཛག་མེད་དུ་བཅིངས་པའི་སྐད་ཅིག་ཆ་བཅུ་དྲུག་པ་ནི་ཡིད་
ནང་དུ་ཚུད་པའམ་ཕྱི་མོ་ཞེས་བྱའོ། །རྡོ་རྗེ་སེམས་དཔའ་རང་འབྱུང་གི་ངོ་བོ་ཆོས་ཀྱི་སྐུའོ། །དེ་ཡང་དཔྱིད་ཀྱི་ཐིག་ལེར། གང་ཚེ་ལོངས་སྤྱོད་རྫོགས་པའི་སྐུ། །ནུབ་པར་གྱུར་པ་དེ་ཡི་ཚེ། །
10-259
བྷ་གའི་ནང་དུ་ཕྱིན་དེ་ཡང་། །ཡུངས་ཀར་ཙམ་དུ་རྣམ་བརྗོད་པ། །ཉི་མའི་གཟུགས་སུ་ཡང་དག་བཤད། །སྤྲུལ་པའི་སྐུར་ནི་བརྗོད་པ་སྟེ། །སངས་རྒྱས་བྱང་ཆུབ་སེམས་དཔའ་རྣམས། །དེ་ཡིས་སྐྱེད་ཅིང་འཕྲོ་
བའོ། །ཞེས་ནས། གོང་བུར་གྱུར་པ་རྙོག་པ་མེད། །འཁོར་བའི་ལམ་ནི་རྣམ་གཅོད་ཅིང་། །སྤྲོས་པ་ཉེར་ཞི་ཞི་བ་སྟེ། །གཉིས་མེད་མཆོག་ཏུ་དགེ་བའོ། །རྡོ་རྗེ་སེམས་དཔའི་རང་བཞིན་ཉིད། །ཅེས་དང་། རྡོ་
རྗེ་མཁའ་འགྲོ་ལས། ཇི་བཞིན་ཤེས་རབ་སྙོམས་ཞུགས་པའི། །ཡང་དག་སྦྱོར་དང་ལྡན་པ་ཡིས། །དེ་བཞིན་གཤེགས་པའི་གཙུག་ཏོར་དཀར། །ཡིད་ནང་ཚུད་པ་དེ་ཡིས་དཔྱད། །མཆོག་ཏུ་དགའ་བ་སྤྲོ་བ་ཡིས། །གནས་
སྐབས་སུ་ནི་མཉེས་པར་འགྱུར། །ཞེས་དང་། དགྱེས་པའི་རྡོ་རྗེར། བྷ་གར་ལིང་ག་རབ་བཞག་ནས། །བྱང་ཆུབ་སེམས་ནི་སྤྲོ་མི་བྱ། །ཁམས་གསུམ་པོ་ནི་མ་ལུས་པ། །སངས་རྒྱས་གཟུགས་སུ་སྤྲོ་བར་བྱ། །
ཞེས་དང་། སློབ་དཔོན་ཀྱེར་ལི་པས། ཨཱ་ལི་ཀཱ་ལི་མཉམ་སྦྱོར་བས། །གང་ཚེ་ནོར་བུར་ཚུད་པ་ནས། །མན་ངག་གིས་ནི་རླུང་བསྡུས་ཏེ། །དེ་ཚེ་ཡེ་ཤེས་མཐོང་བས་འགྲུབ། །ཅེས་དང། དེ་ཉིད་ཀྱིས།
བརྒྱལ་བས་ཀུན་ནས་ཡེ་ཤེས་མེད། །ཅུང་ཟད་ཤེས་པ་ཕྱི་མོའི་ཕྱེད། །རྣམ་པ་ཀུན་གྱི་མཆོག་ལྡན་པའི། །ཡེ་ཤེས་ཕྱི་མོ་ཉིད་དུ་འགྱུར། །ཞེས་གསུངས་པས་སོ། །དེ་ཡང་། ཡིད་ནང་དུ་ཚུད་པ་ཞེས་བྱ་བའི་ཡིད་ནི། 
10-260
སོ་སོ་རང་གི་རིག་པ་སྟེ་ཐིག་ལེ་འཛུག་མེད་དུ་འཆིང་བའི་དངོས་ཀྱི་རྒྱུ་ནི་འདི་འབའ་ཞིག་ཡིན་ལ། །ཉིན་མོའི་གུང་གི་ཉི་མས་ཡུལ་རབ་འབྲིང་ཐ་མ་རྣམས་སྣང་བར་བྱེད་པ་བཞིན་
དུ་མཆོག་ཏུ་དགའ་བའི་ཡེ་ཤེས་ཀྱི་ཉི་འོད་དེས་ཀྱང་ཁམས་གསུམ་པོ་ཐམས་ཅད་སྣང་བར་བྱའོ།། །། བཞི་པོ་ཡེ་ཤེས་ཀྱི་བཟང་པོ་ནི། བདེ་བ་ཆེན་པོའི་ཡེ་ཤེས་ཀྱི་རྟེན་བྱང་ཆུབ་ཀྱི་སེམས་
གྱེན་དུ་གཤེགས་པ་ཤ་ཆེན་གྱི་དངས་མ་ལུས་ཀྱི་ཐིག་ལེ་ལ་ཞུགས་ནས་འཛག་མེད་དུ་འཆིང་བ་བུམ་པའི་དབང་བསྐུར་ནས། སད་པའི་གནས་སྐབས་སྐྱེད་པ་སྦྱངས་ནས་འདུ་བྱེད་ཀྱི་ཕུང་པོ་སྒྲིབ་
བྲལ་དུ་མཛད་དོ། །དེ་ནས་བཤང་གཅིའི་དངས་མ་ངག་གི་ཐིག་ལེ་ལ་ཞུགས་ནས་གསང་བའི་དབང་བསྐུར་བས་རྨི་ལམ་གྱི་གནས་སྐབས་སྐྱེད་པ་སྦྱངས་ནས་གཟུགས་དང་རྣམ་ཤེས་ཀྱི་ཕུང་བོ་སྒྲིབ་བྲལ་
དུ་བྱས། དེ་ནས་ཁུ་བ་དང་ཁྲག་གི་དངས་མ་ཡིད་ཀྱི་ཐིག་ཡེ་ལ་ཞུགས་ནས་ཤེས་རབ་ཡེ་ཤེས་ཀྱི་དབང་བསྐུར་ཏེ་གཉིད་ལོག་པའི་གནས་སྐབས་སྐྱེད་པ་སྦྱངས་ནས་ཚོར་བ་དང་འདུ་ཤེས་
ཀྱི་ཕུང་པོ་སྒྲིབ་བྲལ་དུ་བྱས། དེ་ནས་དབང་པོ་ལྔའི་དངས་མ་ཡེ་ཤེས་ཀྱི་ཐིག་ལེ་ལ་ཞུགས་ནས་དབང་བཞི་པ་བསྐུར་ཏེ་བཞི་པའི་གནས་སྐབས་སྐྱེད་པ་སྦྱངས་ནས་དབང་པོ་དྲུག་ཡུལ་དྲུག་རྣམ་ཤེས་དྲུག་སྐྱེ་མཆེད་བཅུ་གཉིས་ཁམས་བཅོ་བརྒྱད་པོ་ཐམས་ཅད་སྒྲིབ་པ་དང་བྲལ་བར་མཛད་དོ། །
10-261
དེ་ལྟར་རྣམ་སྣང་དང་ཟླ་བའི་དབུགས་འབབ་པ་ལ་ལཱ་ན་དང་། མི་བསྐྱོད་པ་དང་ཉི་མའི་དབུགས་འབབ་པ་ར་སཱ་ན་ད་རྣམས་རོ་མཉམ་པའི་ཐིག་ལེ་བཞི་འཛག་མེད་དུ་འཆིང་བའི་བསམ་
གཏན་ལ་གནས་པས་གཅིག་དང་དུ་མ་དང་བྲལ་བ། བདག་དང་གཞན་ལ་ཕན་པ་ཕུན་སུམ་ཚོགས་པ་ཆེན་པོའི་གཞིར་གྱུར་པ་དངོས་པོ་དང་དངོས་པོ་མེད་པ་དང་བྲལ་བ་ནམཁའ་དང་རོ་མཉམ་
པ་རྟོགས་པར་དཀའ་བའི་རང་བཞིན་ཅན། བག་ཆགས་དང་བཅས་པའི་ཉོན་མོངས་པས་གོས་པ་མེད་པས་ཞི་བ། འགྱུར་བ་མེད་པ་མི་མཉམ་པ་དང་མཉམ་པ་ཀུན་ལ་ཁྱབ་ཅིང་སྤྲོས་པ་མེད་པ།
དཔེ་ཟླ་ཐམས་ཅད་དང་བྲལ་བའི་བདག་ཉིད། དེ་བཞིན་གཤེགས་བརྣམས་ཀྱི་སོ་སོ་རང་གིས་རིག་པའི་ཡེ་ཤེས་ཀྱི་སྤྱོད་ཡུལ་ངོ་བོ་ཉིད་ཀྱིས་དག་ཅིང་འོད་གསལ་བ། བླ་མ་དམ་པའི་ཐུགས་རྡོ་
རྗེ་ཆོས་ཀྱི་སྐུར་གྲུབ་པ་ཡིན་ནོ། །འདི་ནི་རང་འབྱུང་གིས་གྱེན་དུ་གཤེགས་པའི་དབང་དུ་བྱས་ལ། གཞན་དུ་ཆོས་སྐུའི་གསོལ་བ་བཏབ་འདོད་པའི་དངོས་གྲུབ་ཞུས་ནས། ལྕགས་ཀྱུས་འཁོར་ལོ་བཞིའི་ལྟེ་
བར་དགུག །ཞགས་པས་དངས་མའི་ཐིག་ལེ་བཞི་དང་ལྷན་ཅིག་བཅིངས། ལྕགས་སྒྲོག་གིས་དབྱེར་མེད་དུ་བསྡམས་དྲིལ་བུས་མཉེས་པར་བྱའོ།། །།
༄། །བྱང་ཆུབ་སེམས་ཀྱི་དཀྱིལ་འཁོར་དུ་བླ་མ་ངོ་བོ་ཉིད་ཀྱི་སྐུར་སྒྲུབ་པ།
བཞི་པ་བྱང་ཆུབ་སེམས་ཀྱི་དཀྱིལ་འཁོར་དུ་བླ་མ་ངོ་བོ་ཉིད་ཀྱི་སྐུར་བསྒྲུབ་པ་ལ། 
10-262
བདག་གི་གདན། གཞན་གྱི་གདན། རྣལ་འབྱོར་གྱི་གདན། དེ་ཁོ་ན་ཉིད་ཀྱི་གདན་བཞི་ལས། དང་པོ་ནི། ཨིནྡྲ་བྷཱུ་ཏིས། གང་ཞིག་རྟོག་པ་ཀུན་སྤངས་པའི། །དེ་ཉིད་ལ་ནི་ཡང་དག་གནས། །སྒྲུབ་པ་
བོ་དེ་ཚེ་འདི་ཡིས། །བྱང་ཆུབ་དམ་པར་ཞུགས་པར་འགྱུར། །ཞེས་གསུངས་པ་བཞིན་དུ་ལུས་དྲང་པོར་བསྲང་། མིག་ཐད་ཀའི་བར་སྣང་ལ་བཅིངས་ཏེ་དངོས་པོ་དང་དངོས་པོ་མེད་པར་རྟོག་པ་ལ་སོགས་
བའི་ལྟ་བའི་དུག་ཐམས་ཅད་དབྱུང་ནས་མ་བཅོས་པའི་དེ་ཉིད་ལ་མཉམ་པར་གཞག་པས་སྣང་བའི་ཚོགས་སེམས་ལ་ཐིམ་པ། རྣམ་པར་ཤེས་པ་ལྔ་དབང་པོའི་གྲོང་ལས་ལོག་པར་ཕྱོགས་པས་ཡུལ་དུ་
སྣང་ཡང་ཞེན་པ་མེད་པ་ཟླ་བའི་འོད་ཟེར་ལྟ་བུ་ནི་སྣང་བའི་སྐབས་སོ། །དེ་ནས། སེམས་སེམས་བྱུང་ལ་ཐིམ་པ་རྣམ་པར་ཤེས་པ་རྣམས་ཁ་ནང་དུ་ཕྱོགས་པས་ཡུལ་འཛིན་ནུབ་པའི་མི་
རྟོག་པའི་ཏིང་ངེ་འཛིན་སོ་སོར་རྟོག་པའི་ཤེས་རབ་ཁྱབ་བྱེད་དུ་ཞུགས་པ་ཉི་མའི་འོད་ཟེར་ལྟ་བུ་མཆེད་པའི་སྐབས་སོ། །དེ་ནས། སེམས་བྱུང་མ་རིག་པ་ལ་ཐིམ་པ་དེ་གཉིས་གཅིག་གིས་
གཅིག་སྦྱངས་པས་བལྟ་བྱ་དང་ལྟ་བྱེད་གཉིསུ་མེད་པ་གཉིད་ལོག་པ་འདྲ་བ་མུན་པ་ལྟ་བུ་ནི་ཉེར་ཐོབ་ཀྱི་སྐབས་སོ། །དེ་ནས། མ་རིག་པ་ལ་ཐིམ་པས་གཉིད་སད་པ་ལྟ་བུ་རྣམ་པ་ཐམས་ཅད་པའི་སྟོང་པ་ཉིད་མཆོག་ཏུ་མི་འགྱུར་བའི་བདེ་བ་ཆེན་པོ་དང་། 
10-263
རོ་གཅིག་པའི་ཡང་དག་པའི་མཐའ་རང་གི་ངོ་བོ་ཇི་ལྟ་བ་ཚིག་གི་ལམ་དུ་མ་གྱུར་ཅིང་ཐམས་ཅད་ཀྱི་གདགས་པའི་གཞིར་གྱུར་པ། སོ་སོ་རང་གིས་རིག་པའི་ཡེ་ཤེས་ཀྱི་སྤྱོད་ཡུལ་
དུ་བྱས་པ་དེ་ཉིད་ཐམས་ཅད་སྟོང་པ་འོད་གསལ་ལམ། ཕྱག་རྒྱ་ཆེན་པོའམ། དབང་བཞི་པའི་ཡེ་ཤེས་སམ། ལྷན་ཅིག་སྐྱེས་པའི་དགའ་བའམ། བླ་མ་དམ་པ་སེམས་ཀྱི་རྡོ་རྗེ་ཞེས་བྱ་བའི་མིང་
མཐའ་ཡས་པའི་འཇོག་བྱེད་ཀྱིས་རྣམ་པར་གཞག་པ་ཡིནོ། །དེ་ཡང་། ས་ར་ཧས། དབང་པོ་གང་དུ་ནུབ་གྱུར་ཅིང་། །རང་གི་ངོ་བོ་འང་ཉམས་པར་གྱུར། །གྲོགས་དག་དེ་ནི་ལྷན་ཅིག་སྐྱེས་པའི་ལུས། །
བླ་མའི་ཞལ་ལས་གསལ་བར་དྲིས། །ཞེས་དང། དཱ་རི་ཀ་པས། སེམས་དང་སེམས་བྱུང་རང་བཞིན་གྱི། །བདེ་བ་ཆེན་པོའི་རང་བཞིན་སད། །ཅེས་གསུངས་སོ། །དེ་ཉིད་ཐམས་ཅད་ཀྱི་གཞིར་གྱུར་པ་དང་། སྙིང་
པོ་ལེན་པའི་ཕྱིར་དཀྱིལ་འཁོར་ཏེ། སཾ་བུ་ཊ་ལས། བྱང་ཆུབ་སེམས་ནི་རིན་པོ་ཆེ། །དཀྱིལ་འཁོར་དེ་ཉིད་དཀྱིལ་འཁོར་ཏེ། །ཕྱི་རོལ་བཅས་པའི་ནང་ཉིད་ཀྱི། །སྣ་ཚོགས་ཁྱབ་ཅིང་རྣམ་པརགནས། །ཞེས་སོ།། །།
གཉིས་པ་གཞན་གྱི་གདན་ནི། བསམ་གྱིས་མི་ཁྱབ་པའི་བརྟན་པ་དང་གཡོ་བའི་དངོས་པོ་ཐམས་ཅད་དེ་བཞིན་ཉིད་དེ་ཉིད་སྒྱུ་མའི་རང་བཞིན་དུ་ཞུགས་པའི་གཟུགས་བརྙན་ཡིན་པས་སྤང་དུ་མེད་ཅིང་བླང་དུ་མེད་པས་སོ་སོར་རྟོག་པའི་ཡེ་ཤེས་ཀྱི་མིག་གིས་བལྟམ་པས་དེ་དག་དེ་བཞིན་ཉིད་དེ་ཉིད་དུ་ཆུ་ལ་ཆུ་བཞིན་དུ་ཐིམ་པར་འགྱུར་བས། 
10-264
ཚུལ་དེས་ཐབས་ཀྱི་ཆ་ཐམས་ཅད་ཀྱང་ཟུང་འཇུག་གི་མིང་ཐོབ་པར་བྱའོ། །དེ་ཡང་། གཉིསུ་མི་བྱ་གཅིག་ཏུ་བྱ་བ་སྟེ། །རིགས་དང་བྱེ་བྲག་དག་ཏུ་མ་འབྱེད་ཅིག །ཅེས་དང་། འཁོར་བར་བྱེད་བའི་
དངོས་པོ་ཡང་། །བྱང་ཆུབ་སེམས་ཀྱི་རང་བཞིན་བསྒོམ། །ཞེས་སོ།། །། གསུམ་པ་རྣལ་འབྱོར་གྱི་གདན་ནི། ཡང་དག་པའི་མཐའ་ལ་སྙོམས་པར་འཇུག་པས་འཁྲུལ་བའི་དྲི་མ་ཐམས་ཅད་བཞིག་སྟེ་ཤེས་རབ་ཀྱི་ཕུང་
བོ་རྫོགས་པར་བྱེད་པ་དང་། དེ་ཉིད་ཆོས་ཀྱི་དབྱིངས་ཀུན་ཏུ་འགྲོ་བ་ཐབས་ཀྱི་ཆ་རྣམས་ལ་ཞུགས་པས་སྙིང་རྗེ་ཆེན་པོ་མཐརཕྱིན་པར་བྱ་བ་ནི་ཐབས་ཤེས་ཡ་མ་བྲལ་བའི་ཕྱི་ཟུང་འཇུག་
ཅེས་བྱ་ཏེ། གང་ཡང་གཉིས་པོ་སྦྱོར་བར་ནུས་པ་ཡིས། །འཁོར་བར་མི་གནས་མྱ་ངན་འདས་མི་གནས། །ཞེས་དང་། དང་པོའི་སངས་རྒྱས་ལས། ཐབས་དང་ཤེས་རབ་སྙོམས་འཇུག་པ། །རྣལ་འབྱོར་དེ་བཞིན་གཤེགས་
པས་གསུངས། །ཞེས་གསུངས་སོ། ། བཞི་པ་དེ་ཁོ་ན་ཉིད་ཀྱི་གདན་ནི། ངོ་བོ་ཉིད་སྐུའི་གསོལ་བ་བཏབ་ནས་འདོད་པའི་དངོས་གྲུབ་ཞུས་པས་རྩ་དང་། འབྱུང་བ་ལྔའི་རླུང་དང་། ཁམས་བདུད་རྩི་ལྔ་དང་།
འགྱུར་བ་མེད་པ་དང་བཅས་པའི་བདེ་བ་ཆེན་པོའི་ཡེ་ཤེས་གཙུག་ཏོར་གྱི་འཁོར་ལོར་འདུས་པས་འབྲས་བུའི་དབང་བཞི་ཅིག་ཅར་དུ་བསྐུར་ཏེ། བདག་དང་ལྷན་ཅིག་ཡང་དག་པའི་མཐའ་ལ་ཐིམ་པས་བསམ་གྱིས་མི་ཁྱབ་པའི་ཆོས་ཉིད་ཀྱི་ཡོན་ཏན་ཡོང་སུ་རྫོགས་པས་ཤེས་རབ་ཀྱི་རོལ་ཏུ་ཕྱིན་པས་སྤངས་པ་མཐར་ཐུག་པའི་ཕྱིར་འཁོར་བ་ལ་མི་གནས་བ་དང་། 
10-265
དེ་ཉིད་མཆོག་ཏུ་མི་འགྱུར་བའི་བདེ་བ་ཆེན་པོའི་རང་བཞིན་སྙིང་རྗེའི་སྟོབས་ཡོང་སུ་རྫོགས་པ་སད་པར་བྱས་པ་སྒྱུ་མའི་རྗེས་བྱེད་བའི་གཟུགས་བརྙན་སྐུ་གསུང་ཐུགས་གསང་བ་བསམ་གྱིས་མི་ཁྱབ་
པའི་ལྷར་བཞེངས་ནས་ནམཁའ་ཇི་སྲིད་དུ་སེམས་ཅན་གྱི་བསམ་པ་ཚིམ་པར་མཛོད་པས་རྟོགས་པ་མཐར་ཐུག་པའི་ཕྱིར་མྱ་ངན་ལས་འདས་པ་ལ་མི་གནས་པའོ། །ཡེ་ཤེས་ལྔའི་བདག་ཉིད་རིགས་དག་པའི་
ལྷན་ཅིག་སྐྱེས་པའི་ཡེ་ཤེས་ཀྱི་ངོ་བོ་ཉིད་ལ་རྟག་ཏུ་གནས་པ་ཟུང་འཇུག་གི་སྐུའམ། །བླ་མའི་ཡེ་ཤེས་རྡོ་རྗེ་ངོ་བོ་ཉིད་ཀྱི་སྐུ་གྲུབ་པ་སྟེ་འདོད་པའི་དངོས་གྲུབ་ཐོབ་པ་ཞེས་
ཀྱང་བྱའོ། །འདི་འདོད་པ་ནི་འདོད་ཆགས་ཆེན་པོ་སྟེ། རྡོ་རྗེ་སེམས་དཔའ་དོན་ཆེན་པོ་མཆོག་ཏུ་མི་འགྱུར་བའོ། །དངོས་གྲུབ་ནི་ཕྱག་རྒྱ་ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་པ་རྣམ་པ་
ཐམས་ཅད་པའི་མཆོག་དང་ལྡན་པའི་སྟོང་པའོ། །དེ་ཡང། ས་ར་ཧས། ནམ་ཞིག་སྦྱོར་བཞི་གནས་གཅིག་ལ་ནི་ཞུགས་པ་ན། བདེ་ཆེན་མཆོག་ནི་ནམཁའི་ཁམས་སུ་མི་ཤོང་ངོ་། །ཞེས་དང་། དཱ་རི་ཀ་
པས། གསང་བ་ཆེན་པོའི་གནས་མེད་ལ། །རྣལ་འབྱོར་པས་ནི་གསང་ཆེན་སྦྱོར། །ཞེས་དང་། པདྨ་བཛྲ་གྱིས །རིན་ཆེན་སེམས་ནི་བརྟན་གྱུར་ན། །སངས་རྒྱས་བྱང་ཆུབ་རབ་གནས་ཏེ། །བྱིན་གྱིས་བརླབ་པ་མཛད་པར་འགྱུར། །
10-266
ཞེས་གསུངས་པ་དང་། རྡོ་རྗེ་དྲིལ་བུ་པས། འདི་ནི་ངོ་བོ་ཉིད་ཀྱི་སྐུ། །སྟོང་ཉིད་ཐུགས་རྗེའི་བདག་ཉིད་དོ། །མ་ནིང་ཞེས་ཀྱང་གྲགས་པ་ཡིན། །ལ་ལར་ཟུང་འཇུག་ཅེས་བྱའོ། །ཞེས་གསུངས་ཤིང་། གསང་
བ་འདུས་པ་ལས། འདི་ལྟ་སྟེ། བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་རྡོ་རྗེ་གསང་བའི་མངོན་པར་རྟོགས་པའི་དབང་བསྐུར་བའི་སློབ་དཔོན་ལ་དེ་བཞིན་གཤེགས་པ་
ཐམས་ཅད་དང་། བྱང་ཆུབ་སེམས་དཔའ་རྣམས་ཀྱིས་ཇི་ལྟར་བལྟ་བར་བགྱི། དེ་བཞིན་གཤེགས་པ་ཐམསཅད་ཀྱིས་བཀའ་སྩལ་པ། རིགས་ཀྱི་བུ། བྱང་ཆུབསེམས་དཔའ་རྡོ་རྗེ་ལྟ་བུར་དེ་བཞིན་གཤེགས་པ་ཐམས་ཅད་དང་།
བྱང་ཆུབ་སེམས་དཔའ་རྣམས་ཀྱིས་བལྟ་བར་བྱའོ། །དེ་ཅིའི་ཕྱིར་ཞེ་ན། བྱང་ཆུབ་ཀྱི་སེམས་ཀྱི་རྡོ་རྗེ་དང་སློབ་དཔོན་འདི་གཉིས་ནི་གཉིས་སུ་མེད་ཅིང་གཉིས་སུ་བྱར་མེད་དོ། །མདོར་བྱས་ནས་བསྟན་
པར་བྱ་སྟེ། ཕྱོགས་བཅུའི་འཇིག་རྟེན་གྱི་ཁམས་ན་སངས་རྒྱས་དང་བྱང་ཆུབ་སེམས་དཔའ་ཇི་སྙེད་འཁོད་ཅིང་འཚོ་བ་དང་སྐྱོང་བ་དེ་ཐམས་ཅད་དུས་གསུམ་དུ་ལྷགས་ནས་སློབ་དཔོན་དེ་ལ། དེ་བཞིན་
གཤེགས་པ་ཐམས་ཅད་ཀྱིས་མཆོད་པས་ཡང་དག་པར་མཆོད་དེ། སངས་རྒྱས་ཀྱི་ཞིང་དེར་ཡང་འགྲོའོ། །ངག་རྡོ་རྗེའི་ཡི་གེ་ཡང་འདི་སྐད་བརྗོད་དོ། །བདག་ཅག་དེ་བཞིན་གཤེགས་པ་ཐམས་ཅད་ཀྱི་ཕའོ། །བདག་ཅག་དེ་བཞིན་གཤེགས་པ་ཐམས་ཅད་ཀྱི་མའོ། །
10-267
ཞེས་བྱ་བ་ནས། བདག་ཅག་དེ་བཞིན་གཤེགས་པ་ཐམས་ཅད་ཀྱི་སྟོན་པའོ་ཞེས་བྱ་བའི་བར་རོ། །འདི་ལྟ་སྟེ། དཔེར་ན་རིགས་ཀྱི་བུ། སངས་རྒྱས་བཅོམ་ལྡན་འདས་ཕྱོགས་བཅུ་ན་ཇི་སྙེད་བཞུགས་ཤིང་
རབ་ཏུ་སྤྱོད་པའི་སངས་རྒྱས་བཅོམ་ལྡན་འདས་དེ་རྣམས་ཀྱི་སྐུ་དང་གསུང་དང་ཐུགས་རྡོ་རྗེའི་བསོད་ནམས་ཀྱི་ཕུང་པོ་བས་ཀྱང་སློབ་དཔོན་གྱི་བ་སྤུའི་བུ་ག་གཅིག་འཕགས་སོ། །དེ་ཅིའི་ཕྱིར་ན།
རིགས་ཀྱི་བུ། བྱང་ཆུབ་སེམས་ནི་སངས་རྒྱས་བཅོམ་ལྡན་འདས་ཐམས་ཅད་ཀྱི་ཡེ་ཤེས་ཀྱི་སྙིང་པོར་གྱུར་པ་དང་། སྐྱེ་བའི་གནས་སུ་གྱུར་པ་དང་། ཐམས་ཅད་མཁྱེན་པའི་ཡེ་ཤེས་ཀྱི་འབྱུང་གནས་ཡིན་
པའི་བར་དུའོ། །ཞེས་གསུངས་པས། ལམ་འདི་ནི་རྡོ་རྗེ་ཐེག་པར་ངེས་པའི་ཚིག་ཏུ་བཞག་པའོ་ཞེས་ཤེས་པར་ཡང་བྱའོ།། །།
༄། །གེགས་སྲུང་བར་བྱེད་པ་དམ་ཚིག།
གསུམ་པ་གེགས་སྲུང་བར་བྱེད་པའི་དམ་ཚིག་ནི། ཁྱོད་ཀྱིས་སྲོག་ཆགས་བསད་པར་
བྱ། །བརྫུན་གྱི་ཚིག་ཀྱང་སྨྲ་བར་བྱ། །མ་བྱིན་པར་ཡང་ཁྱོད་ཀྱི་ལོང་། །གཞན་གྱི་བུད་མེད་སྟེན་པར་གྱིས། །ཞེས་གསུངས་པ་སྟེ། སྲོག་གཅོད་པ་ནི་དངོས་པོར་བལྟ་བ་སྤངས་ནས་དུས་སོགས་ཀྱི་མཚན་
ཉིད་ཅན་གྱི་སྟོང་པ་ཉིད་དུ་བལྟ་བའོ། །བརྫུན་སྨྲ་བ་ནི་ལས་ཀྱི་རླུང་ཐམས་ཅད་དབུ་མའི་དབུགས་གཅིག་ཏུ་བྱས་པ་གཞོམ་དུ་མེད་པའི་སྐད་ཀྱིས་སྨྲ་བའོ། །མ་བྱིན་པར་བླང་བ་ནི། རིགས་ལྡན་མ་ཨ་ཝ་དྷཱུ་ཏཱིའི་ཁུ་བ་དེ་བཞིན་གཤེགས་པའི་ཚོགས་སོ་སོར་རང་རིག་པས་གཙུག་ཏོར་དུ་ལེན་པའོ། །
10-268
གཞན་གྱི་བུད་མེད་ནི། གཞན་རྡོ་རྗེ་སེམས་དཔའི་བུད་མེད་རྣམ་པ་ཐམས་ཅད་པའི་ཤེས་རབ་ཀྱི་ཕ་རོལ་ཏུ་ཕྱིན་པ་ལ་བདེ་བ་ཆེན་པོའི་ཡེ་ཤེས་རྙེད་པ་སྦྱོར་བར་བྱེད་པའོ། །དེ་དག་
གིས་ཉིན་མཚན་ཟད་པར་བྱེད་པ་ནི་རྟག་ཏུ་དམ་ཚིག་གནས་པ་སྟེ་ཉེས་པར་གྱུར་པ་སྐྱེ་བའི་གནས་སྐབས་དང་བྲལ་ཤིང་འདོད་པའི་དངོས་གྲུབ་ཚེ་གཅིག་ལ་དུས་རིང་པོ་མིན་པས་ཐོབས་འགྱུར་
རོ།། །།
༄། །བོགས་འདོན་པར་བྱེད་བ་སྤྱོད་པ།
བཞི་པ་བོགས་འདོན་པར་བྱེད་པ་སྤྱོད་ནི། སྤྱོད་པ་དག་ནི་བྱ་བར་བཤད། །སྤྱོད་པས་ཕ་རོལ་ཕྱིན་མཆོག་ཉིད། །ཅེས་བྱ་བ་ལ་སོགས་པ་གསུངས་པས། བླ་མའི་དམ་ཚིག་ལ་གནས་པའི་རྣལ་
འབྱོར་པ་དེས་དང་པོར་བྷུ་སུ་ཀུའི་སྤྱོད་པ་ལ་འཇུག་པ་སྟེ། བྷུ་ནི་ཟ་བ་སྟེ། ཟ་བ་ཙམ་མ་གཏོགས་པའི་འདུ་འཛི་ཐམས་ཅད་ཡོངསུ་སྤང་བར་བསྟན་ཅིང་། སུ་ནི་གཉིད་ཁུག་པ་སྟེ།
གཉིད་ལོག་པས་སྣང་བ་ཐམས་ཅད་འོད་གསལ་ལ་ཐིམ་པས་མཚོན་ཏེ་ཕུང་སོགས་ཀྱི་ཆོས་ཐམས་ཅད་ཀྱི་འཇུག་པ་བསྡུས་ནས་རྣམ་པ་ཐམས་ཅད་པའི་སྟོང་པ་ཉིད་ལ་གཞུག་པར་བྱའོ། །ཀུ་ནི་གཤང་
བར་འགྲོ་བ་སྟེ། དེ་ཙམ་ལས་ལུས་དང་ཚོར་བ་དང་དབང་པོའི་རང་བཞིན་རྣམས་བྱ་བ་གཞན་ལ་བསམ་དུ་མི་འཇུག་པའོ། །དེས་རྣལ་འབྱོར་ལ་གོམས་པའི་དྲོད་རྙེད་ནས་གསང་བའི་སྤྱོད་པ་ལ་འཇུག་སྟེ། 
10-269
སྨྱོན་པའི་གཟུགས་སུ་གནས་པས། མི་རོ་ལ་སོགས་པ་ལྔ་བཟའ་བ་དང་། མི་གཙང་བ་སྒྲོན་མ་ལྔ་སྐོམ་དུ་བཏུང་བའི་ཟས་སློང་བས་འཚོ་བས་བྱ་བའི་ཆ་ཙམ་ཡང་མི་འཛིན་པ་དང་། ཞེ་
ལ་འདོད་པ་མེད་པར་བྱས་ཏེ། གཅིག་པུ་དུར་ཁྲོད་དུ་འདུག་པ་དང་། ཡི་དྭགས་ཀྱི་གྲོང་དུ་ཤ་ཟ་ལྟ་བུར་རྒྱུ་བས་བདག་ཉིད་ཀྱི་རྩའི་ལྷ་རྣམས་མཉེས་པར་བྱའོ། །དེ་མཉེས་པས་ཕྱི་རོལ་
གྱི་མཁའ་འགྲོ་མ་རྣམས་མཉེས་ཏེ། ཅི་བསྒོ་བ་ཉན་པ་དང་། ཐོགས་པ་མེད་པའི་སྟོབས་དང་། མི་སྣང་བ་དང་། བུ་གར་གནས་པ་ས་འོག་གི་དངོས་གྲུབ་དང་། སྟེང་དུ་འཕུར་བ་མཁའ་སྤྱོད་དང་།
གྲུབ་པའི་སྔགས་དང་སྨན་རྐང་པ་ལ་བྱུགས་པས་གང་འདོད་ཀྱི་གནས་སུ་སླེབ་པའི་རྐང་མགྱོགས་དང་། དངུལ་ཆུ་ལ་སོགས་པ་གྲུབ་པའི་རྫས་འགའ་ཞིག་ཟོས་པས་ཉི་ཟླ་དང་མཉམ་པའི་ཚེ་སྟེར་བར་
བྱེད་ཅིང་། མངོན་པར་ཤེས་པ་དང་རྫུའཕྲུལ་ཐོབ་པར་འགྱུར་རོ། །སྨྱོན་པའི་གཟུགས་སུ་བཞག་པར་བྱ། །རང་འདོད་ལྷ་ཡི་རྣལ་འབྱོར་གྱིས། །ཤ་ཟ་བཞིན་དུ་ཀུན་ཏུ་འཁྱམ། །ཞེས་གསང་བ་གྲུབ་པའི་གསང་བའི་
སྤྱོད་པའི་སྐབས་ལས་སོ། །དེ་ནས་རིག་པ་བརྟུལ་ཞུགས་ཀྱི་སྤྱོད་པ་ལ་འཇུག་སྟེ། དབང་ཕྱུག་ཆེན་པོའི་གཟུགས་སུ་བྱས་ནས་མཐར་སྐྱེས་ལྷ་མིན་གྱི་གྲོང་དུ་ཞུགས་ནས་བསྒྲུབ་བའམ། ལུས་ངག་ཡིད་ཐམས་ཅད་ཧེ་རུ་ཀའི་རང་བཞིན་དུ་བྱས་ནས་ཅང་ཏེའུ་དང་ག་ཊྲཱཾ་ག་ཐོགས་ལས་ཀྱི་ཕྱག་རྒྱ་ལ་སྦྱར་བས་བདེ་བ་ཆེན་པོའི་ཡེ་ཤེས་བསྒྲུབ་ཅིང་སྡིག་པ་དང་དགེ་བའི་ཕྱོགས་གཉིས་སུ་མི་སྤྱོད་ཅིང་འཁོར་བ་ལོངས་སྤྱོད་དུ་ཁྱེར་ནས་ངག་གི་བརྗོད་བ་ཐམས་ཅད་སྔགས་དང་། 
10-270
ཡན་ལག་གི་བསྐྱོད་པ་ཐམས་ཅད་ཕྱག་རྒྱར་ཤེས་པས་གང་འདོད་པའི་གནས་སུ་སེང་གེ་ལྟ་བུར་རྒྱུ་བར་བྱ་བའོ། །ཚོགས་ཀྱི་དབང་ཕྱུག་གཟུགས་བྱས་ནས། །གང་དུ་སུས་ཀྱང་མི་ཤེས་པར། །མཐར་སྐྱེས་
ནང་དུ་འཇུག་པར་བྱ། །ཞེས་དང་། རིགས་ལས་བྱུང་བའི་ཆོ་ག་ཡིས། །རིག་པའི་བཏུལ་ཞུགས་བཟང་པོ་སྤྱད། །གཉིས་མེད་ངེས་པར་བྱས་ནས་ནི། །ཚེ་འདི་ཉིད་ལ་འགྲུབ་པར་འགྱུར། །ཞེས་པདྨ་བཛྲ་ཀྱིས་སོ། །
དེ་ནས་ཕྱོགས་ལས་རྣམ་རྒྱལ་གྱི་སྤྱོད་པ་ལ་འཇུག་སྟེ། ལུས་གཏོང་བའི་སྦྱིན་པ་དང་། སེམས་ཅན་གྱི་དོན་འཛིན་པའི་ཚུལ་ཁྲིམས་དང་། དྲག་པོ་ཚ་བའི་སོག་ལེས་གཤོག་པ་ལ་སོགས་པ་ཡང་བཟོད་
པའི་བཟོད་པ་དང་། འཇིག་རྟེན་ཆོས་བརྒྱད་ཀྱི་གནོད་པ་ལ་མཉམ་པ་ཉིད་ཀྱི་བརྩོན་འགྲུས་དང་། དངོས་པོ་ཐམས་ཅད་ཀྱི་རྗེས་སུ་འབད་པ་མེད་པར་རང་གི་ངང་གིས་འཇུག་པའི་བསམ་གཏན་དང་། རྩོལ་
བ་མེད་པར་རོ་གཅིག་པའི་འཇུག་པས་ཆོས་ཐམས་ཅད་མི་དམིགས་པར་རྗེས་སུ་རྟོགས་པའི་ཤེས་རབ་ཀྱིས་སོ། །རྗེ་བཙུན་ནཱ་རོ་པས། སྡིག་པ་ཀུན་ལས་རྣམ་གྲོལ་ཞིང་། །གཟུང་དང་འཛིན་པ་རྣམ་སྤངས་
པ། །ཕྱོགས་ཀུན་རྣམ་རྒྱལ་ཞེས་བྱར་བརྗོད། །ཅེས་གསུངས་པའོ། །དེ་ལྟ་བུའི་རྣལ་འབྱོར་ལས་ལྡང་བའི་ཚེ། ཇི་ལྟར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱི་ཡེ་ཤེས་དང་། 
10-271
སངས་རྒྱས་ཀྱི་སྤྱན་གྱིས་མཁྱེན་ཅིང་གཟིགས་པའི་དགེ་བའི་རྩ་བ་གང་གི་རིགས་གང་ཡིན་པ་དང་། སྡེ་གང་ཡིན་པ་དང་། མཚན་ཉིད་གང་ཡིན་པ་དང་། རིགས་གང་ཡིན་པ་དང་། ཆོས་གང་ཡིན་པས་
ཡང་དག་པར་གནས་པ་དེ་ལ་དེ་དག་གིས་ཇི་ལྟར་མཁྱེན་པ་དེ་ལྟར་བདག་གིས་ཀྱང་རྗེས་སུ་ཡི་རང་། དེ་ད་ག་གིས་དགེ་བའི་རྩ་བ་བླན་མེད་པ་ཡང་དག་པར་རྫོགས་པའི་བྱང་
ཆུབ་ཏུ་བསྔོས་པ་ལྟར་བདག་གིས་ཀྱང་ཡོངས་སུ་བསྔོ་བར་བགྱིའོ། །ཞེས་བྱ་བའི་ཡོངས་སུ་བསྔོ་བ་ཆེན་བོས་ཡོངས་སུ་བསྔོ་བར་བྱའོ། །ཐུན་མོང་གི་བླ་མ་སྒྲུབ་བའི་ཐབས་ཇི་སྙེད་པ་ཞིག་ཀུན་
གྱི་སྤྱོད་པའི་ཡུལ་དུ་མཛད་ལ། ཐུན་མོང་མ་ཡིན་པའི་སྒྲུབ་པའི་ཐབས་ཀྱི་ཆོ་ག་འདི་ལྟ་བུ་སྔན་ཆད་ཤིན་ཏུ་སྦས་པ། བདག་གིས་གཞན་ལ་བརྩེ་བའི་བསམ་པས་བགོ་བཤར་བྱས་པ་ལ།
བླ་མ་མཁའ་འགྲོའི་ཚོགས་ཀྱིས་བདག་ལ་བཟོད་པར་མཛོད་ཅིག་ཅེས། བློ་གསལ་པདྨ་དཀར་པོ་དད་པའི་ནོར་གྱིས་ཕྱུག་པ་དེས། མཁའ་འགྲོ་མ་འདུ་བ་དུང་གི་བྲག་གི་བསམ་གཏན་གྱི་ཁང་པར་སྦྱར་
བ་དགེ་ལེགས་སུ་གྱུར་ཅིག །དད་པའི་ཉིན་བྱེད་དཔལ་དང་མ་འགྲོགས་པའི། །རྟོག་གེའི་མུན་ནང་ཡུས་པའི་མཁས་རློམ་གྱི། །བུང་བས་རྒྱུད་སྡེའི་འདབ་བརྒྱ་མྱངས་གྱུར་ཀྱང་། །ངེས་དོན་སྦྲང་རྩི་མྱོང་བའི་སྐལ་བ་ཅི། །
10-272
བླ་མའི་ཞབས་ཀྱི་པདྨོའི་བཅུད་འཐུང་བའི། །རྒྱུད་དོན་མན་ངག་སྦྲང་རྩི་གསང་བའི་ཚོགས། །ས་ལ་སྐྱུག་ནུས་ད་ལྟ་གང་ཅན་ན། །པད་དཀར་འཛིན་པའི་རྐང་དྲུག་ཁོ་བོ་ཙམ། །ཞེས་སོ།། །།
༄། །ལམ་ཟབ་ཀྱི་འཁྲུལ་འཁོར་གྱི་འགྲེལ་པ་བཞུགས་སོ།།
༄༅། །ལམ་ཟབ་
ཀྱི་འཁྲུལ་འཁོར་གྱི་འགྲེལ་པ་བཞུགས་སོ།། སྐྱིལ་ཀྲུང་ལག་བཅག་སར་བཙུགས་ལུས་བསྲངས་ནས། །ཧིང་ཧཱུྃ་ཧག་ཧིག་དང་སྦྱར་སྦྱོར་བ་དྲུག །ཚངས་པས་འཁོར་ལོ་བཞི་ལ་འདྲེན་པས་དགུག །ལུས་མཚུངས་ལག་གཡས་སར་
གཚུགས་གཡོན་པ་ཡི། །མཐེབ་སྲིན་གྱིས་ནི་ཉི་ཟླའི་རྒྱུ་བ་མནན། །ཉམས་སྐྱེས་ལུས་ཀུན་གཡས་གཡོན་དལ་བུར་བཅུད། །མཐའ་མར་ཐུབ་ཚད་རླུང་མནན་བཅིང་བ་ཡིན། །སེང་གེ་རྣམ་གྲོལ་ཕྱག་རྒྱས་ལུས་བསྐོར་ཞིང་། །
རླུང་མནན་ལུས་འདར་དེ་སྲིད་མཐའ་མར་ནི། །ལག་པ་བསྐོར་ཞིང་ལུས་ཕག་རྐང་པ་གཉིས། །བརྐྱང་བ་སྟབས་གཅིག་གིས་ཀྲུག་བསྡམས་པ་ཡིན། །རླུང་མནན་ཁྲུ་གང་སྟེགས་སུ་ཕོངས་གཞག་ཅིང་། རྐང་པ་གཉིས་གཤིབས་
ཁུ་ཚུར་ཕྱག་རྒྱ་སྟེང་། །རྐྱོང་དང་ལངས་པ་ནུ་ཁར་དབབ་དང་སྡེབ། །བསྟུན་པ་མཉེས་པར་བྱེད་པའི་འཁྲུལ་འཁོར་གསུང་། །མཆོག་གི་ལམ་དུ་ཆས་པར་འདོད་པ་ཡི། །ཆ་མེད་རྒྱུས་གཏམ་སྨྲ་བའི་ཕྱིར་འབྲངས་
ཀྱང་། །འདོན་པའི་རེ་བ་འགྲུབ་པའི་གནས་སྐབས་བྲལ། །དེ་ཕྱིར་ཅེར་མཐོང་ལག་ཁྲིད་ཤེས་ལ་ཉོན།། །།སརྦ་མངྒལཾ།།


